PFL və "Misli" İdman jurnalistləri arasında 4-cü dəfə intelektual yarış keçirib - bu dəfə paytaxtdan kənarda

Peşəkar Futbol Liqası və “Misli”nin təşkilatçılığı ilə Dünya Azərbaycanlılarının Həmrəyliyi Günü və Yeni ilə həsr olunmuş, idman jurnalistləri arasında intellektual yarış keçirilib.

Presssport.az xəbər verir ki, 60-dan çox media nümayəndəsinin iştirak etdiyi turnir maraqlı və yaddaqalan alınıb.

Dövlət Vergi Xidmətinin Şamaxı tədris mərkəzində baş tutan yarışda komandalara Azərbaycan Premyer Liqasının 2025/26 mövsümündə iştirak edən 12 komandanın adları verilib. Tamamilə Azərbaycan futboluna həsr olunmuş suallar əsasında keçirilən yarışda sona qədər gərgin mübarizə gedib.

Belə ki, qalib “qızıl oyun”da müəyyənləşib. Yekunda “Sumqayıt” qalib, "Sabah" 2-ci, "Kəpəz" 3-cü olub.

Tədbirin sonunda çempion komandaya kubok və medallar təqdim edilib.

Turnirdə qaliblə yanaşı, 2-ci və 3-cü yerin sahibləri də pul mükafatı qazanıb.

Xatırladaq ki, bu, sayca 4-cü belə yarış olub və ilk dəfə paytaxtdan kənarda baş tutub.