Rəşad Sadıqovun "siftə"si və ya Lüksemburqdakı qələbədən sonra bitən intizar

Rəşad Sadıqov avrokuboklarda baş məşqçi kimi ilk qələbəsini qazanıb.

Presssport.az xəbər verir ki, 42 yaşlı mütəxəssis buna çalışdırdığı “Zirə”ylə qitəmiqyaslı turnirdə 3-cü matçında nail olub.

Belə ki, Rəşad Sadıqovun komandası Avropa Liqasının I təsnifat mərhələsində "Şerif"i Moldovada 1:0 hesabıyla məğlub edib. “Qartallar” hazırkı baş məşqçisiylə bunadək Konfrans Liqasında çıxış edərək 2 il əvvəl I təsnifat mərhələsində Təl-Əviv “Makkabi”sinə yenilmişdi - evdə 0:3. səfərdə 0:0.

Sadıqovun futbolçu kimi avrokuboklarda son qələbəsi də məhz Avroliqada olmuşdu. Bu, karyerasını bitirdiyi, kapitanı olduğu "Qarabağ"la 2019-ci ilin oktyabrın 3-də qrup mərhələsində Lüksemburqda "Düdelanj"la matçda darmadağınla reallaşmışdı ki, Sadıqov həmin 4:1-də 90 dəqiqə meydanda olmuşdu. 

Onu da bildirək ki, “Zirə”ylə avrokuboklarda debüt edən Ayxan Abbasov da baş məşqçi ilk qələbəsini burda qazanmışdı. Bu, 7 il əvvəl Avropa Liqasının I təsnifat mərhələsində Lüksemburq "Differdanj"ını Bakıda 2:0 hesabıyla məğlub etdiyi matçdı.