Biri “Bakı” idi, “Sabah”la 100 oldu

"Sabah" Konfrans Liqasının III təsnifat mərhələsində üz-üzə gəldiyi Bolqarıstan təmsilçisi "Levski"nin tarixinə düşüb.

Presssport.az xəbər verir ki, Masazır təmsilçisi avrokuboklarda sofiyalılar üçün 100-cü rəqibi olub.

"Levski" indiyədək Azərbaycan klublarından yalnız "Bakı" ilə üz-üzə gəlib. 2009-cu ildə ildə keçirilmiş həmin dueldə - Çempionlar Liqasının II təsnifat mərhələsinin oyunlarında Bolqarıstan komandası daha üstün olub - səfərdə 0:0, evdə 2:0.

“Levski” avrokuboklarda ilk oyununu 60 il əvvəl - 12 sentyabr 1965-ci ildə "Rosunda" stadionunda İsveç "Yurqorden"inə qarşı keçirib. Görüş "göylər"in məğlubiyyəti ilə yekunlaşıb - 1:2.

"Levski" indiyədək 220 oyunda 300 qol vurub. Qolların 3-ü komandanın aktivinə avtoqolla yazılıb.

Sonuncu topu iki həftə əvvəl İsraildən "Hapoel" (Beer Şeva) ilə qarşılaşmada Mustafa Sanqare vurub. Ümumilikdə isə 110 fərqli oyunçu fərqlənib.