Azərbaycan millisində yeni bombardir - Qurban Qurbanovu keçdi

Azərbaycan milli komandasının kapitanı Emin Mahmudov Ukrayna yığması ilə keçirilən DÇ-2026-nın seçmə mərhələ oyununda qol vuraraq, tarixi rekorda imza atıb.

Presssportaz xəbər verir ki, 33 yaşlı yarımmüdafiəçi millinin heyətində qollarının sayını 15-ə çatdırmaqla ən məhsuldar futbolçu olub. 

O, sabiq hücumçu Qurban Qurbanova məxsus 21 illik rekordu yeniləyib. “Qarabağ”ın baş məşqçisi 1992-2005-ci illər ərzində millinin heyətində keçirdiyi 68 oyunda 14 dəfə fərqlənib.

Qurbanov sonuncu qolunu 2004-cü ildə Latviya ilə yoldaşlıq görüşündə (2:2) vurmuşdu. Mahmudov isə 2016-cı ildən şərəfini qoruduğu Azərbaycan millisinin heyətində 56-cı matçında 15 qola çatıb.

Maraqlıdı ki, Emin millidə ilk qolunu məhz Qurbanov millimizin baş məşqçisi olanda vurub. Bu, 2018-ci ilin iyunun 9-da Latviya yığmasına Riqada 3:1 hesabıyla qalib gəldikləri yoldaşlıq görüşünün 68-ci dəqiqəsində olub.