Berdiyev üçün baş hakimin qərarını dəyişməsi anlaşılmaz qalıb: "Qırmızı vərəqədən sonra bu xal yaxşıdı"

"Bütün komanda adından Zəfər Günü ilə əlaqədar Azərbaycan xalqını təbrik edirəm. Oyun gözlədiyimiz kimi ağır keçdi. Qırmızı vərəqədən sonra işimiz daha da çətinləşdi. Futbolçulara təşəkkür edirəm ki, xarakter göstərdilər, əks-hücumlarda maksimum çalışdılar və yaratdığımız epizodlar kifayət qədər təhlükəli idi".

Presssport.az xəbər verir ki, bu sözləri Misli Premyer Liqasının 11-ci turunun "Zirə" - "Turan Tovuz" (0:0) matçından sonra mətbuat konfransında Kurban Berdiyev səsləndirib.

Rusiyalı mütəxəssis ardından jurnalistlərin suallarını cavablandırıb.

- Roberto Olabe qırmızı vərəqə aldığına görə cəzalanacaq?

- Xeyr, belə bir şey olmayacaq. O, başqa cür oynaya bilmir. Döyüşkən xarakteri var, hamımızın bundan xoşu gəlir. Amma ona bildirmişdim ki, ehtiyatlı ol, sarı vərəqən var.

- "Turan Tovuz"un bu mövsüm ilk heç-heçəsi idi. Aktivinizə bir xal yazdınız, yoxsa iki xal itirdiniz?

- Qırmızı vərəqədən sonra bu xal yaxşıdı.

- Sizcə, Əliyar Ağayev ilk hissədə qırmızı vərəqə qərarını dəyişməklə doğru etdi?

- Mühakimə etmək çətindir. Bilmirəm baş hakim qərarını niyə dəyişdi.