Cüdoçumuz Xorvatiyada qızıl medal qazanıb

Azərbaycan cüdoçusu Xorvatiyanın paytaxtı Zaqrebdə keçirilən Qran-Pridə qızıl medal qazanıb.

Presssport.az xəbər verir ki, son yarış günündə yığmamız aktivinə 2 mükafat yazdırıb.

+100 kq çəki dərəcəsində mübarizə aparan Kənan Nəsibov bütün rəqiblərinə qalib gələrək qızıl medal qazanıb. O, finalda Niderland idmançısı Yur Spaykersi ipponla məğlub edib.

90 kq çəkidə çıxış edən Vüqar Talıbov isə 3-cü yer uğrunda görüşdə komanda yoldaşı Aslan Kotsoyevdən üstün olaraq bürünc mükafata sahib çıxıb.

Bu yerdə bildirək ki, daha əvvəl Hüseyn Allahyarov (60 kq) bürünc medala yiyələnib.

Beləliklə, 1 qızıl və 2 bürünc medal əldə edən Azərbaycan 48 ölkə arasında ümumi komanda hesabında 5-ci, kişilərin mübarizəsində isə 4-cü yeri tutub.