Baxşıyevin nə özünün, nə də komandasının üzərində təzyiq var: "Özünə də tövsiyə etmişəm ki, mətbuatdan uzaq qalsın"

"Araz-Naxçıvan" Misli Premyer Liqasının 14-cü turunda səfərdə "Kəpəz"i 2:0 hesabı ilə məğlub edib.

Presssport.az xəbər verir ki, Muxtar Respublika təmsilçisinin baş məşqçisi Elmar Baxşıyev matçdan sonra keçirilən mətbuat konfransında jurnalistlərin suallarını cavablandıraraq ilk olaraq qələbəni şərh edib.

- Ağır oyun olacağını bilirdik. "Kəpəz" son dövrlərdə yaxşı performans göstərir. İdeal oynamasaq da, komanda şəklində qələbə üçün hər şey etdik. Qarşıdakı matçlara hazırlaşacağıq.

- Komanda uzun müddətdir məğlub olmur. Arxayınlıq yoxdur?

- Futbolçular uzun müddət komandadan ayrı idilər. Millidən olan oyunçuların yoxluğu komandanın ritmdən düşməsinə səbəb olmuşdu. Layiqli qələbə qazandıq. Daha da inkişaf edə bilərik.

- Urfan Abbasovun oynamamasının səbəbi nə idi?

- Zədəsi yoxdur. Sadəcə, bir az narahatlığı var idi deyə süni meydançada oynatmağa risk etmədik və onu Bakıda saxladıq.

- Mustafa Əhmədzadə millidən hansı əhval-ruhiyyədə dönüb?

- Onun haqda çox danışırıq. Özünə də tövsiyə etmişəm ki, mətbuatdan uzaq qalsın. Bir az bərkiməlidir, inkişaf etməlidir.

- Uğurlu seriya üzərinizdə təzyiq yaradır, yoxsa əlavə motivasiya verir?

- Üzərimdə heç bir təzyiq yoxdur. Komanda da mənim kimidir. Bu klubda işləmək üçün hər cür şərait yaradılıb. Oyun planında daha yaxşı ola bilərik. Futbolçuların məşqdə göstərdiyi performansa görə bunu deyirəm.