Zaur Axundov məşqçilərin qarşısına qoyduğu tələb və "Araz-Naxçıvan"ın Naxçıvana qayıdışı haqda: "Jurnalistlər kimi, azarkeşlər də həmişə düz deyir"

"Naxçıvan Futbol Federasiyasının rəhbəri kimi uşaq futboluyla bağlı işlərə indidən başlamışıq. Orda daxili çempionat başlayacaq. Bir ay öncə daxili iclas elədim. İki ay vaxt vermişəm. Məşqçilərin maaşların da qaldırmışam ki, əlavə motivasiya olsun. Amma mənə oyunçu verməlidirlər. Tapşırmışam ki, nə edirsiniz-edin, mənə 12-13 oyunçu verin. Lazım olsa valideynlərdən xahiş edəcəm. Hamısı olmasa da, 7-8 nəfəri Bakıya gətirəcəm".

Bu fikirləri Presssport.az-ın Tovuza ezam olunmuş əməkdaşına açıqlamasında Naxçıvan Futbol Federasiyasının prezidenti Zaur Axundov deyib.

O, Muxtar Respublikada uşaq futbolunda çalışan məşqçilərə hər bir şəraiti yaradacağını vurğulayıb: “Ki, gələcəyə ”material" olsun. İldə iki dəfə bunu edəcəyik. Alınmasa, məşqçilər işini itirəcək. Yeni komanda quracam. Niyə ancaq əcnəbiləri gətirməliyəm? Yaxşı azərbaycanlı futbolçunu çıraqla axtarırıq. Yanvarın 10-u Naxçıvana gedəcəm. Özümlə Elmar Baxşıyev və onun köməkçilərini də aparacam. Qoy, görmədiyimi onlar peşəkar gözü ilə görsün. 5 nəfər seçilsin, amma seçilsin. Belə işləmək lazımdı".

Maraqlıdı, bəs, Axundov komandanı nə vaxt Naxçıvana aparır?: “Bu, ən yaralı yerimdi. Stadionda işləri maya qədər bitirmək istəyirik. I Liqada komandanın oyununa 10 min azarkeş gəlirdi. Bunun nəyi pisdi? Naxçıvana gedəndə az qala öldürürdülər məni…Xahiş edirdilər ki, Naxçıvan komandası Naxçıvanda oynamalıdı. Düz də deyirlər. Jurnalistlər kimi, azarkeşlər də həmişə düz deyir. Bunun üzərində işlər gedir. AFFA ilə də danışıqlar aparırıq. Meydança süni olacaq. Çünki Naxçıvanın iqlimi çox ağırdı. VAR maşını ilə bağlı problem necə olacaq? Bu artıq AFFA-nın işidi. Gedəcəyiksə, onlar da dəstək olacaq”.

Məlumdu ki, “Araz-Naxçıvan” cari mövsümdə çox uğurla çıxış edərək turnir cədvəlində 2-ci pillədən aşağı düşmür. Yekunda növbəti il avrokuboklara vəsiqə qazansa, oyununu Naxçıvanda keçirlə bilər? Axundovu dinləyək: "Hələ avrokuboklara vəsiqə qazanaq, sonra bunu danışarıq. Keçənilki mənə dərs olub. Onda da qışa qədər yaxşı gəlmişdik. "Qarabağ"ı 2:1 məğlub edəndən sonra 8 oyun uduzduq. Kaş elə onda "Qarabağ"a uduzardıq…"