Baxşıyev futbolçularından güc alır: "Jurnalistlərdə belə fikir formalaşıb ki, "Araz-Naxçıvan" həmin prizmadan yanaşır"

"Araz-Naxçıvan" Misli Premyer Liqasının 15-ci turunda öz meydanında "Turan Tovuz"u 1:0 hesabı ilə məğlub edib.

Presssport.az xəbər verir ki, Muxtar Respublika təmsilçisinin baş məşqçisi Elmar Baxşıyev oyundan sonra keçirilən mətbuat konfransında jurnalistlərin suallarını cavablandıraraq ilk olaraq görüşlə bağlı fikirlərini bölüşüb.

- Ağır oyun alındı. Bilirdik ki, kimə qarşı oynayacağıq. "Turan Tovuz" bu mövsüm iddialıdı, meydanda yaxşı işlər görür. Komandanı çətin oyuna hazırlamışdıq. Şükürlər olsun ki, istədiyimizə nail olduq. Yolumuza davam edirik.

- “Turan Tovuz”la xal fərqini bir az da artırdınız. Qış fasiləsinədək bir qədər rahatlıq olacaq?

- İlk turdan gərginlik yoxdu. İşimizi daha çox stressdən uzaq etməyə çalışırıq. Keyfiyyətli, təcrübəli kollektivimiz var. Komandamız daha da məzmunlu oynamağa çalışacaq.

• "Araz-Naxçıvan" I Liqada oynayanda baş məşqçi Əsgər Abdullayev idi. Azarkeşlər ona deyirdilər ki, "1:0 olsun, bizim olsun" prinsipindən vaz keçin. Sizdə də belədir. Bu məqam sizi narahat etmir ki?

- Yox. Sadəcə, jurnalistlərdə belə fikir formalaşıb ki, "Araz-Naxçıvan" həmin prizmadan yanaşır. Amma görürük ki, komanda hücumdadı. Hər oyunda 6-7 epizoda giririk, dəyərləndirmədə “axsama”lar var. Komanda şəklində məşqlərdə işlədiyimiz elementləri oyunda görürük. Qarşıdakı matçlarda hücum planında daha kreativ ola bilərik.

- Bazar günü "Neftçi" - "Qarabağ" matçı var. “Neftçi”nin xal almağını istəyirsiz?

- Daha çox öz komandamıza köklənmişik. Futbolçulara da deyirəm ki, daha çox özümüzü düşünək. 

- Bu mövsüm Kurban Berdiyevi artıq iki dəfə məğlub etmisiz. Təcrübəli mütəxəssisi məğlub etməyiniz özünüzə məşqçi kimi özünəinam verir?

- Bu suala ikitərəfli yanaşmaq olar. Mən özüm futbolçulardan güc alıram. Məşq prosesində həmin enerjini komandada görürəm. Onlar mənə güc verir -yanaşmaları, istəkləri ilə. Biz də qarşılıqlı şəkildə bunu onlara qaytarırıq.