Modriç həm ən yaxşı seçildi, həm də Avropa çempionatları tarixində qol vuran ən yaxşlı futbolçu oldu

AVRO-2024-ün qrup mərhələsinin III turu çərçivəsində B qrupunda keçirilən Xorvatiya - İtaliya oyununun (1:1) ən yaxşısı müəyyənləşib. 

Presssport.az xəbər verir ki, bu ada Xorvatiya millisinin kapitanı Luka Modriç layiq görülüb. 

Matçın 54-cü dəqiqəsində penaltini qaçıran 38 yaşlı yarımmüdafiəçi 1 dəqiqə sonra komandasını hesabda önə keçirib. Lakin Modriçin bu qolu qələbə üçün kifayət etməyib. Belə ki, 90+8-ci dəqiqədə qapısında top görən xorvatlar yekunda heç-heçə ilə kifayətlənib və bu nəticə ilə qrup mərhələsini 2 xalla 3-cü pillədə başa vurub.

Modriç həm də 38 yaş 289 günlüyündə İtaliya millisinin qapısına yol tapmaqla Avropa çempionatları tarixində qol vuran ən yaşlı futbolçu olub. 

B qrupunun digər matçı olan Albaniya - İspaniya oyununun ən yaxşı futbolçusunun da adına aydınlıq gəlib. Bu, İspaniya millisinin futbolçusu Fernan Torres olub. 24 yaşlı hücumçu matçın 13-cü dəqiqəsində vurduğu qolla ispanlara 1:0 hesablı qələbə qazandırıb. Özü də Torres bunu AVRO-2024-də ilk dəfə meydana start heyətində çıxmaqla reallaşdırıb.