Azər Bağırov "qara zolaq"dan çıxmaq üçün planlar cızır: "Hər 2 hissədə bağışlanmaz səhvlər etdik"

"Oyundan-oyuna nələrisə daha yaxşı edirik. Amma yenə də konsentrasiyadan düşürük. İlk hissədə daha yaxşı mübarizə apardıq. Hər 2 hissədə bağışlanmaz səhvlər etdik. "Zirə"ni təbrik edirəm. Hər bir oyunun özünün istəyi, tapşırığı var. Futbolçuları da get-gedə tanıyırıq. Məşqçilər korpusu olaraq düşündük ki, meydana sonradan daha yaxşı yerli oyunçular girə biləcək. Ona görə belə qərar verdik".

Presssport.az xəbər verir ki, bu sözləri “Kəpəz”in baş məşqçisi Azər Bağırov Misli Premyer Liqasının VIII turunun “Zirə” ilə oyundan sonra mətbuat konfransında deyib.

O, ardından jurnalistlərin suallarını cavablandırıb:

- "Qara zolaq"dan çıxmaq üçün hansısa planlar cızırsınız?

- Əlbəttə ki, cızırıq. Bu gün Paçunun gəlməsi, Pananın bizə qoşulmasını görürük. Oyun planında da, bəzi dəyişikliklər var. Onları rotasiya edib yoxlayırıq. Düşünürəm ki, əsasən də müdafiədə daha çox dəqiq olmalıyıq. Mən gələndən 3 oyun keçirmişik. "Araz-Naxçıvan"la qola qədər pis mübarizə aparmadıq. "Zirə" ilə görüşdə də qola qədər pis deyildik. Futbolçular bəzi məsələləri anlayırlar ki, nə etmək lazımdır. Bunu 90 dəqiqəlik “çərçivə”yə salmaq lazımdır.

- Yeni oyunçular olacaq?

- Qışa qədər transferlərimiz tamamlanıb. Amma hər şeyi zaman göstərəcək. Bir oyunçu da dünən bizə qoşuldu.