Frank De Blekere "Neftçi" - "Sumqayıt" qarşılaşmasındakı mübahisəli epizodları şərh edib

AFFA Hakimlər Komitəsinin sədri Frank De Blekere Azərbaycan Premyer Liqasının VIII turunda baş tutan “Neftçi” – “Sumqayıt” qarşılaşmasındakı mübahisəli epizodları şərh edib.

Presssport.az qurumun mətbuat xidmətinə istinadən xəbər verir ki, belçikalı mütəxəssis 55-ci dəqiqədə Kilan Lebonun epizoduna və 63-cü dəqiqədə Yuri Matiasla Roy Kehat arasında baş verənlərə aydınlıq gətirib: “Neftçi”nin oyunçusu Kilan Lebon meydanın özlərinə aid hissəsində “Sumqayıt”ın futbolçusu Roy Kehatın formasını tutur. Tutma anında “Sumqayıt”ın futbolçusu “Neftçi”nin 3 oyunçusunun əhatəsindədir. Nəticə olaraq perspektivli hücum dayandırılmır və sarı vərəqə verilməməlidi. “Neftçi”nin oyunçuları yaxınlıqda olmasaydılar, hakimin qərarı fərqli olardı və sarı vərəqə gözlənilirdi. Çünki bu halda perspektivli hücumun dayandırılması müzakirəsi aparıla bilərdi.

63-cü dəqiqədəki epizodda cərimə meydançasının içində “Neftçi”nin oyunçusu Yuri Matias ilk olaraq topa toxunur. Onun təbii hərəkəti nəticəsində “Sumqayıt”ın hücumçusu Roy Kehat ilə (futbol təması) yüngül kontakt yaranır və hücumçunu yıxır. Çox önəmli texniki kriteriya müdafiəçinin ilk olaraq topa toxunmasıdı. Bu səbəbdən də hakimin qərarı doğrudur. Topla əlaqə olmasaydı, bu situasiya fərqli qərarla nəticələnərdi".

Xatırladaq ki, "Neftçi" - "Sumqayıt" görüşü 1:1 hesabı ilə bitib.