Santuş acınacaqlı məğlubiyyətin səbəblərini göstərdi: "Normal vəziyyətdə bu oyunun ilk yarısı 2:0 xeyrimizə olmalı idi"

Azərbaycan milli komandası UEFA Millətlər Liqasının III turu çərçivəsində səfərdə Estoniyadan acınacaqlı məğlubiyyət alıb - 1:3.

Presssport.az xəbər verir ki, yığmamızın baş məşqçisi Fernandu Santuş matçdan sonra keçirilən mətbuat konfransında jurnalistlərin suallarını cavablandıraraq öncə qarşılaşmanı dəyərləndirib.

- Oyuna yaxşı başladıq. 35-ci dəqiqəyə qədər kompakt oynadıq. Rəqibin şansları olmadı. Amma futbol belə oyundu. Rəqib ilk qolu vurandan sonra özümüzü toparlayıb hesabı bərabərləşdirdik. İlk yarıya əlavə olunmuş dəqiqələrdə 2-ci qolu buraxdıq. Rəqib də ağıllı komandadı. Əks-hücumda oynamağa başladılar. Şanslarımızı dəyərləndirə bilmədik. Topu qapıdan keçirə bilmirsənsə, rəqib bundan faydalanır.

- Yarımmüdafiənin mərkəzində iki futbolçu qalmışdı. Onlar sanki "çatdıra" bilmirdi. Məğlubiyyətdə seçdiyiniz taktiki sxemin rolu oldu?

- 3-4-3 sistemi ilə oynayırdıq. Mərkəzdə 4 futbolçu var idi. İlk 35 dəqiqədə bizim oyunçular rəqibə oynamağa imkan yaratmırdı. Onlar əks-hücumda qol vurdu. Bizim buna qədər 4 şansımız var idi, amma istifadə edə bilmədik. Fikrimcə, komanda birinci hissədə ən yaxşısını etdi. Taktiki sxemdə səhv olmayıb. 3 qol buraxdıq, amma o qədər də qol vurmaq şanslarımız oldu. Normal vəziyyətdə bu oyunun ilk yarısı 2:0 xeyrimizə olmalı idi. 

- Əlinizdə olan futbolçuların səviyyəsinin yetərli olduğunu düşünürsünüz?

• - Başa düşürəm, amma oyunçuların çox yaxşı şansları oldu. Bu, futboldur, belə şeylər olur. İsveçlə oyunda da çoxlu şanslardan yararlana bilmədik. Bizim problem müdafiədədi - 3 oyunda 8 qol buraxmışıq. Vacib olan odur ki, işimizi davam etdirməliyik. 1-2 həftə ərzində problemləri həll etmək mümkün deyil. Nəsə əldə etmək üçün vaxt lazımdı.

- Hücum futbolu oynadırsınız. Cəsarətlidir, amma bunun arxasında güc yoxdur. Bu taktika ilə davam edəcəksiniz?

- Xeyr, taktikanı dəyişməyi düşünmürəm. Hücum futbolu oynamağa üstünlük verirəm. Bir yol seçmişik. Hər dəfə dəyişmək olmur. Əlimdə olan futbolçularla bu sxemlə davam edəcəyəm. Yarımmüdafiə xəttində 4 oyunçu olacaq.

- Elvin Cəfərquliyev bu gün mükəmməl oyun keçirdi. Onun gələcəkdə hansısa yaxşı kluba keçməsinə töhfə verə, hansısa tanışınıza məsləhət görə bilərsiz? 

- Elvin möhtəşəm hücum talantına malikdi. Amma müdafiə cəhətdən bir az çətinlikləri var. Öz üzərində işləməklə şansları ola bilər. Həm hücumda, həm müdafiədə eyni səviyyədə oynamaq çətindi.