Baxşıyev çox ağır çempionat gözləyir: "Həmişə bir məqsədimiz olub – çempionluq"

"Bu mövsüm sürətli, aqressiv basketbol oynayacağıq”.

Presssport.az xəbər verir ki, bunu NTD-nin baş məşqçisi Tahir Baxşıyev klubun mətbuat xidmətinə açıqlamasında deyib.

 O, komandanın yeni mövsümə hazırlığından danışıb: “Hazırlıq prosesindən razıyam. İki yoxlama oyunu keçirdik. Oyunçuların, bütün komandanın müsbət və mənfi cəhətlərini gördük. Bu mövsüm ən gənc komandamız olacaq. Ən təcrübəli oyunçumuz 25 yaşlı Əkbər Məmmədovdur. Bütün oyunçular oynamaq üçün böyük bir istəklə gəldi. Çox ağır çempionat gözləyirəm. Keçən mövsüm autsayderlərə qarşı matçlar da olurdu. Bu il belə olmayacaq. Hər oyun vacibdi. A qrupunda bütün komandalar güclənib, keyfiyyətli legionerlər cəlb edib. Yeni limit daha sürətli basketbol deməkdir”.

 Baxşıyev hədəflərin heç vaxt dəyişmədiyini söyləyib: “Bir çox məşqçilər deyirlər ki, onların məqsədi pley-offa çıxmaqdı. Həmişə bir məqsədimiz olub – çempionluq. Komanda meydançaya çıxırsa, yalnız qələbə üçün oynamalıdır. NTD klubunda hədəflər heç vaxt dəyişməyib. Bəli, çətin olacaq. Liqada “Sabah” kimi komanda var. Onlar avrokuboklarda oynayırlar, güclü legionerlərə malikdirlər. Amma biz yalnız çempionluq üçün oynayacağıq”.

Xatırladaq ki, Azərbaycan Basketbol Liqasında 2024/25 mövsümünə oktyabın 18-də start veriləcək.