Region Liqasının debütantı çempion olmağı hədəfləyib: "Şimal bölgəmizdə ən ciddi problem stadion problemidi"

AFFA-nın keçirdiyi Region Liqasında bu mövsüm debütantlardan biri “Şimal”dı. Xaçmazı təmsil edən bu komanda özünü debütant kimi aparmayaraq çıxış etdiyi Paytaxt və Şimal zonasında B yarımqurupunda 1-ci yeri tutdu. İddiası bununla kifayətlənməyən “Şimal” liqanın da qalibi olmaq fikrindədi. Klubun idman direktoru Elxan Yusifli Presssport.az-a müsahibəsində bu və digər mətləblərdən söz açıb.

• - Püşkün nəticəsindən nə dərəcədə razı qalmısınız?

- Əslində, bizim komanda yenidi, bu mövsüm yaranıb. İlk olaraq qarşımıza təcrübə toplamaq məqsədi qoymuşuq. Müəyyən mərhələlərdən, turnir cədvəlində yerimizi alandan sonra həm baş məşqçimiz, həm də rəhbərliyimiz çempion ola biləcəyimizi müəyyənləşdirdi. Buna görə hədəfimiz Region Liqasının qalibi olmaqdı. Pley-offa püşkdə qarşımıza kimin çıxacağı bizi o qədər çəkindirmirdi. “Neftçala”yla, maraqlı rəqiblə düşmüşük. İlk oyun səfərdə oldu və 1:1 yekunlaşdı. Cütün qalibi istənilən halda, 2 oyunun yekununa əsasən müəyyənləşəcək. Ümid edirik ki, evdə bu komandanı keçəcəyik. Sonra yolumuzda daha ciddi rəqiblər görünür. Fikilərşirik ki, bizim yarımfinala gedən yolda ən çətin rəqiblərimizdən biri “Çinar Zəngilan”dı. Amma istənilən halda, rəqibdən asılı olmayaraq, rəqib fərq etməyərək hədəfimiz dediyim kimi, çempionluqdu. 

- Bir şeyi də nəzərə alaq ki, liqada təcrübəli komandalar var, siz isə debütantsınız. Bu mənada çempionluq nə dərəcədə real görünür? 

- Onu deyim ki, bizim komanda liqada debütant olsa da, heyətimizdəki bir çox oyunçu ötən mövsüm Region Liqasının qalibi olub. Bu, hazırda baş məşqçimiz olan Tural Cəlilov və 4-5 futbolçudu. Onlar keçən mövsüm çempion olan "Qusar"ın əsasını təşkil edib. Xaçmaz və Qubadan olan futbolçulardı. Onlar bu mövsüm "Şimal"da cəmləşiblər. Uğurlu çıxışımızın arxasında da bu amil durur. Buna görə də “Hypers” kimi iddialı komandanı qrupda qabaqlayaraq 1-ci olmağı bacarmışıq. Hər 2 oyunda onlara məğlub olmadıq - 2:2 və 1:1. Ölçü vahidi kimi "Hypers"i götürsək, bu komandanı ən güclülərdən biri saysaq, çempion olmasaq belə, finaladək irəliləyəcəyimizi düşünürük. “Dördlər finalı”na çıxıb medalçı olmaq məqsədimizdi. 

- Pley-off öncəsi heyətinizi gücləndirmək yönündə çalışmalarınız necə oldu? 

- Hiss elədik ki, ehtiyat oyunçular skamyamız qısa idi. Buna görə pley-off öncəsi fasilədən istifadə edib 3 oyunçu transfer etdik. Bizim qrupda Qusar təmsilçisi "Şirvanovka" oynayırdı, pley-offa çıxa bilmədi, ordan gəliblər. Elə elədik ki, ehtiyatda hər an oyunun müqəddəratını dəyişə bilən futbolçularımız olsun. Onların da bu liqada təcrübələri var, əvvəlki komandalarda əsas heyət üzvləri olublar.

- Rəhbərlik maddi təminatları necə həyata keçirir?

- Bəzi komandalar çempionata qoşulur, ardından sponsor axtarışına düşür. Sonradan bu yöndə problemə yaranır ki, buna görə çempionatı yekunlaşdıra bilmirlər. Bizdə isə çempionat başlayanda artıq sponsorumuz vardı. Bu, xarici ölkələrə meyvə-tərəvəz idxalı-ixracıyla məşğul olan şirkətdi. Mövsümün əvəvlində büdcəmiz müəyyənləşib ki, nə qədər xərcimiz çıxacaq. Sponsor turnir başa çatandək bizə lazım olan maliyyə dəstəyini göstərəcək. Bu üzdən bir rahatlıq var, inşallah, heç bir maddi problemimiz olası deyil. Bizim futbolçular Region Liqasında ən yaxşı maddi təmin olunan, vaxtı-vaxtında hər oyundan sonra qonorar alanlardı. Stadionumuzla bağlı rəsmi müqaviləmiz var. Bəlkə çox az komanda var ki, belə şəraiti var. SOCAR-ın Sosial Təminat İdarəsiylə icarə müqaviləsi imzalayaraq stadionu icarəyə götürmüşük. Bu, Siyəzəndəki stadiondu. vaxtilə "Qusar" oynadığı. 

• - Bəs, Xaçmazda stadionla bağlı vəziyyət necəd? 
• - Qeyd etmək istərdim ki, şimal bölgəmizdə ən ciddi problem stadion problemidi. Yalnız işə yarayan biri var ki, bu da Siyəzədəki stadiondu. Hamı ora cəmləşib. Bu mövsüm Qusarın bir komandası Şamaxıda oynayır, biri Sumqayıtda. Biz də Siyəzəndə rəqiblərimizi qəbul ediirk. Bəli, Xaçmazda Olimpiya İdman Komplekinin stadionu var. Amma çox təəssüf ki, həm ölçüsü standartlara uyğun deyil, həm də ot örtüyü “yox” səviyyədədi. Stadionun özü isə yaxşı vəziyyətdədi. Yalnız meydança problemi var ki, onu süni örtük etsələr, nəinki Xaçmaz, ətrafdakı bütün bölgələr ondan yararlana bilər.
• - Başqa ərazidə stadion inşası necə? 
• - Onu bildirim ki, Xaçmaz 200 min əhalisi olan bir rayondu. Kənd stadionları var. Sadəcə, ora stadion kimi yanaşsaq, sıfırdan boş torpaqdan başqlama kimi bir şeydi. Xaçmazın digər təmsilçisi var ki, o da oyunlarını Qusarda Şirvanlı kəndinin stadionunda keçirirdi. 
• - Uzun fasilədən sonra Xaçmazda futbol komandası var. Nə dərəcədə ajiotaj var? 
• - Xaçmazda futbola maraq çox böyükdü. Düzdür, bu vaxtadək hansısa liqada təmsil olunmayıb. Yalnız 90-cı illərdə “Nabran” komandası olub, həvəskar liqasında oynayıb. Orda da peşəkar yanaşma olmayıb. Amma "Şimal" ilk futbol klubudu ki, Xaçmazda yaradıldı. Komandanın adından görürsünüz ki, hədəfimiz təkcə Xaçmazla kifayətlənməyib, bütün şimal bölgəsinin komandasına çevrilə bilməkdi. 
• - Bəs, II Liqaya qatıtmaq perspektivi nə dərəcədə realdı?
• - Bu istiqamətdə ciddi iş aparılır. Sırf hədəfləyirik ki, bu il Region Liqasının qalibi olaq, növbəti mövsümdə II Liqada çıxış edək. Əslində, bəlkə elə bu mövsümdə müraciət edib çıxışımıza II Liqada başlaya bilərdik. Amma heç bir təcrübə olmadığından, istədik ki, ilk olaraq Region Liqasında təcrübə qazanıb, ən azı oyun, reqlament, oyun qaydalarını bilib, sonra başlayaq. O cür də işimizə başlamışıq. Amma necə deyərlər, iştaha diş altındadı. Qalib gəlsək, qaydalara görə II Liqaya çıxacağıq və inşallah, burdan da daha irəlilələmək fikrindəyik.