"Mükəmməl qoldan sonra heç-heçə də bizim üçün xoş oldu" - Adil Şükürov

“Kəpəz” Premyer Liqanın XXX turunda səfərdə "Səbail"lə 3:3 hesablı heç-heçə edib.

Presssport.a xəbər verir ki, Gəncə təmsilçisinin baş məşqçisi Adil Şükürov matçdan sonra keçirilən mətbuat konfransına matç haqda fikirlərini bildirməklə başlayıb.

- Yaxşı oyunla azarkeşlərimizi sevindirə bildik. Bizdən gözləntilər çox idi. Birinci hissədə komanda çox yaxşı futbol oynadı. Bunun nəticəsində 2 qol vurduq. Gözlənilməz əvəzetmələr oldu. Bundan sonra oyunumuzda düşüş hiss olunurdu. İkinci hissənin əvvəlində diqqətsizlikdən qollar buraxdıq. Son dəqiqələrdə Mate Kvirkiyanın vurduğu mükəmməl qolla 1 xal qazandıq.

- İlk hissədəki qələbə gözəl idi, yoxsa son dəqiqə qolu ilə qazanılan 1 xal?

- Birinci hissədə qələbəyə daha yaxın idik. Mükəmməl qoldan sonra heç-heçə də bizim üçün xoş oldu.Mükəmməl qoldan sonra heç-heçə də bizim üçün xoş oldu.

- İkinci hissədə müdafiə xəttində nə baş verdi?

- Fasilədə futbolçulara tapşırdıq ki, diqqətli olun, oyun hələ bitməyib. Ani diqqətsizlik oldu. Komanda tam olaraq özünə gəlməmiş 2-ci qolu buraxdıq.

- Təbii örtüklü meydançada məşq edirsiniz. Bu gün süni meydançada oynadız. Zədələrin bununla əlaqəsi var?

- "Səbail"in stadionunun ot örtüyü bir az fərqlidi. Burda oynamaq çətin olur. Tovuzda da süni örtükdə oynayırıq, amma belə zədələr olmur.

- Şahin Diniyev oyundan sonra sizinlə görüşmədi. Nə baş verib?

 - Heç bir şey olmayıb. Yəqin, Şahin müəllim əsəbi olub. Burda problem yoxdu.

- Hakimlikdən razı qaldız?

- Hakimlik haqda çox danışmağa dəyməz. Onlar da insandı. Baxış bucaqları fərqli ola bilər.