Juninyodan "Qarabağ"dakı gələcək karyerası ilə bağlı: "Buna köklənmişəm ki, hələ..."

"Qarabağ"ın futbolçusu Olavio Juninyo Azərbaycan kubokunun yarımfinal mərhələsinin "Neftçi" ilə cavab görüşündən sonra jurnalistlərə açıqlama verib.

Presssport.az xəbər verir ki, 28 yaşlı hücumçu əvvəlcə komandasının finala adlaması haqda təəssüratlarını bölüşüb: "Təbii ki, qeydə alınan nəticəyə və finalda olduğumuza görə xoşbəxtik. Titulu qazanmağa cəmi 1 oyun qalıb. Bu, final oyunudur və bir matçdan ibarətdir. Kim daha hazırlıqlı olacaqsa, o da qələbə qazanacaq".

Braziliyalı forvard "Neftçi"yə ilk görüşdə 4:0 hesabı ilə qalib gəlməklərinə baxmayaraq, cavab matçında da istəkli oynayaraq 4:1 hesablı qələbə qazanmaqlarının səbəbini də açıqlayıb: "Məşqçimiz rahatlaşmağımıza imkan vermir. Hər oyuna qələbə üçün köklənirik".

Juninyo "Qarabağ"da qalıb-qalmayacağı haqda suala belə cavab verib: "Klubumla hələ 2 illik müqaviləm var. Amma bu, futboldu, hər şey olur. Gələcəklə bağlı nəsə demək asan deyil. Buna köklənmişəm ki, hələ klubla 2 illik müqaviləm var".

Olavio sonda adının tez-tez Fransa klubları ilə hallanması haqqında danışıb: "Sözün düzü, heç nədən xəbərim yoxdu. Bu məsələlərlə menecerim məşğul olur. Dediyim kimi, "Qarabağ"la 2 illik müqaviləm var. Azərbaycanda, "Qarabağ"da xoşbəxtəm. Yalnız buna köklənmişəm. Başqa nəsə deyə bilmərəm".

Xatırladaq ki, Juninyo ötən ilin yayından "Qarabağ"da oynayır.