"Londona ən yaxşı oyunumuzu göstərmək üçün gedirik" - "Qarabağ"ın legioneri

“Stadionda əla atmosfer var idi. Hiss olunurdu ki, Azərbaycan derbisidir. Bu, həm də mənim “Qarabağ”da ilk derbim idi. Çox şadam ki, qələbə qazandıq, 3 xal əldə etdik”.

Presssport.az xəbər verir ki, bu sözləri “Qarabağ”ın qapıçısı Mateuş Koxalski deyib.

Polşalı qolkiper Misli Premyer Liqasının 7-ci turunda “Neftçi”yə 4:0 hesabı ilə qalib gəldikləri görüşü belə şərh edib: “Yaxşı oynadıq. Əvvəlki matçlarda bir qədər problem yaşayırdıq, çox qol vura bilmirdik. Lakin “Neftçi” ilə görüşdə 4 dəfə fərqlənə bildik. Buna görə çox şadam. Nəticəyə baxmayaraq, oyun heç də asan keçmədi. “Neftçi”nin heyətində çox yaxşı oyunçular var”.

Koxalski UEFA Avropa Liqasının Liqa mərhələsinin 1-ci turu çərçivəsində səfərdə “Tottenhem”ə qarşı keçirəcəkləri matçdan da söz açıb: “Onlara qarşı oynamaq mənim arzumdur. “Tottenhem” çox böyük klubdur. Londonda ən yaxşı oyunumuzu göstərmək üçün gedirik. Əlimizdən gələni edəcəyik ki, səfərdə yaxşı nəticə qazanaq” (qol.az).