Tovuzda Qərb derbisi - bu dəfə veteran futbolçuların qarşılaşması

Çempionluğun və “Turan”ın ölkəmizi ilk dəfə “Fənərbaxça” ilə oyunlarda qitəmiqyaslı yarışda təmsil etməsinin 30 illiyi ilə əlaqədar olaraq “Turan” və “Kəpəz”in veteran futbolçuları arasında yoldaşlıq oyunu keçirilib. 

Presssport.az xəbər verir ki, oyundan öncə qonaqlar Tovuz futbol məktəbinin banisi Qara Əliyev, veteran futbolçu Təvəkkül Hüseynov, “Turan”ın ilk baş məşqçisi Zahid Hüseynov, AFFA-nın keçmiş prezidenti Ramiz Mirzəyev, “Turan” adının komandaya verilməsinin təşəbbüskarı Novruz Həsənov, “Turan”ın kapitanı və baş məşqçisi olmuş Sakit Alıyev və şəhid futbolçumuz Vaqif Tağıyevin məzarları ziyarət edib.

Tovuz şəhər stadionunda akademiya, inzibati bina və burda yaradılan şəraitlə tanış olan qonaqlar daha sonra çay süfrəsi arxasında söhbət edib. İştirakçılar Tovuz şəhər stadionunda 1946-cı ildə faciəvi şəkildə dünyasını dəyişmiş futbolçularımızın, Şəhid futbolçumuz İlqar Zeynallının və Şəhidlərimizin xatirələrinə inşa edilmiş abidələrin önünə gül dəstələri düzüb, onları ehtiramla yad edib. 

Saat 15:00-da başlayan Qərb derbisini beynəlxalq dərəcəli hakim Tahir Süleymanov idarə edib. Ona bu oyunda yan xətdə təcrübəli hakimlər Sabir Hacıyev və Azad Hüseynov kömək edib. Oyunda topa ilk zərbəni “Turan”ın təsisçisi və ilk prezidenti Vidadi Əhmədov yerinə yetirərək “Turan Tovuz” PFK-nın İdarə Heyətinin sədri Ehtiram Quliyevə ötürüb. Oyunda “Turan”ın heyətində Nizami Sadıqov, Eldəniz Hüseynov, Nizami Ocaqverdiyev, Elxan Abdıyev, Eltay Aslanov, Vəli Hüseynov, Məqsəd Yaqubəliyev, Elşad Əhmədov, Vidadi Rzayev, Qurban Qurbanov, Musa Qurbanov, Rüfət Quliyev, Etimad Qurbanov, Kamran Əlibabayev, Ülfət Mədətov və Kamal Ələkbərov meydana çıxıb. Dostluq şəraitində keçən oyun 5:5 hesabı ilə başa çatıb. “Turan”ın heyətində Musa Qurbanov (2), Etimad Qurbanov, Qurban Qurbanov və Nizami Ocaqverdiyev fərqlənib. “Kəpəz”dən isə qolların müəllifləri Rövşən Əhmədov, Ceyhun Tanrıverdiyev, Kamal Hüseynov, Mətləb Məmmədov və Rəhman Əzizov olub.

Oyundan sonra qonaqlar banketdə bir araya gəlib. Uzun müddət Tovuz Rayon Gənclər İdman İdarəsinin rəisi kimi çalışmış Sahib Ələsgərova 65 illik yubileyi münasibəti ilə “Turan Tovuz”un “65 nömrə”li forması təqdim edilib.