Ronaldinyo Adnan Əhmədzadənin şəxsi qonağıdı: "Çox sadə insandı, bizimlə səmimi görüşdü, özünü dartmadı"

“Ronaldiyo ilə görüşümüz bu gün səhər saatlarında oldu. Bizi yığdılar ”Buta Palace"ın arxasındakı meydançaya. ASTA orda məşqlərini edir".

Bu fikirləri Presssport.az-a açıqlamasında veteran futbolçu Davud Kərimi deyib.

Uzun illər böyük futbolda çıxış etmiş, son illərdə minifutbol yığmamızın üzvü olan 40 yaşlı qapıçı Bakıya COP29 ilə əlaqədar səfər edən əfsanəvi braziliyalı futbolçu, dünya çempionu Ronaldinyo ilə bağlı görüşdən təəssüratlarını bölüşüb: “Çox sadə insandı, çox xoşum gəldi. Gəlib hamıyla bir-biri səmimi şəkildə görüşdü, özünü dartmadı. Düzdü, görüşə bir az gec gəldi. Yəqin, bu da Bakıya gec gəlib çatmağı ilə bağlı idi ki, yuxudan gec oynamışdı. Sonra bizi tərk edərək yenidən gec gələcəyini dedi və qayıdıb uşaqlarla ayrıca görüşdü. Kim özüylə forma gətirmişdisə, hamısını imzaladı, şəkillər çəkdirdi. Hər halda, yeniyetmə futbolçularımız üçün böyük motivasiya olar".

Minifutbol millimizin heyətində Avropa çempionu olan Kəriminin sözlərinə görə, Ronaldinyonun bu görüşü ASTA-nın yaradıcısı və sahibi, SOCAR-ın sabiq vitse-prezidenti olan Adnan Əhmədzadənin şəxsi təşəbbüsüylə olub: “O, Adnan müəllimin şəxsi qonağıdı. Çox güman ki, bu səfər də COP29-a görə olub. Bu görüş ASTA-nın rəhbərliyinin təşəbbüsüylə baş tutdu. Rəhbərliyimiz də 4-5 kluba demişdi ki, futbolçularınızı görüşə göndərin. ”Zirə", "Qarabağ", "Sabah", "Neftçi", “Sumqayıt”ın oyunçuları orda idi. Hər klubdan 5 futbolçu və1 məşqçi gəlmişdi. Yəqin, Adnan müəllim ASTA-nın İspaniya ilə əlaqələri haqda Ronaldinyoya məlumat verib. Görüşdə Rafael Bünyadov vardı ki, hansı ki Əhmədzanənin Bakıdakı işlərini görür. O, ASTA-nın prezidentidi, işlərimizlə bağlı onunla əlaqə saxlayırıq. Rafael Yusufov isə həm baş məşqçimiz, həm də koordinatorumuzdu".

Xatırladaq ki, ASTA Futbol Akademiyası (Azerbaijan Sport Talents Academy) ilə İspaniyanın Barselona şəhərində yerləşən “Marset” Futbol Akademiyası arasında əməkdaşlıq müqaviləsi imzalanıb. Sazişə əsasən, keçən ilin yayında Bakıya gələn ispaniyalı məşqçilər ASTA tərəfindən seçilən 2008-2009-cu il təvəllüdlü 50 istedadlı futbolçu arasında seçim edərək, onlardan təxminən 15-20-sini ölkələrinə aparmışdı.