Baxşıyev başqa komandanın nəticəsinə görə xoşbəxtlik axtarmaq istəmir: "Bizi düşündürən "Turan Tovuz" deyil, özümüzük"

"Araz-Naxçıvan" Misli Premyer Liqasının 30-cu turu çərçivəsində səfərdə "Kəpəz"lə 0:0 hesablı heç-heçə edib.

Presssport.az xəbər verir ki, Muxtar Respublika təmsilçisinin baş məşqçisi Elmar Baxşıyev matçdan sonra keçirilən mətbuat konfransına görüş haqda danışmaqla başlayıb.

- Ağır oyun alındı. Belə olacağını təxmin edirdik. Sıx qrafikdəyik. İkinci hissədə oyunun tepmini qaldırdıq, epizodlar yaratdıq. Uda da bilərdik, uduza da. Gələn oyuna hazırlaşacağıq.

- Müdafiədə boşluqlar çox idi. Bunun səbəbi nədir?

- Sırf müdafiəçilərlə bağlı deyil. Heyətimizdə çoxlu zədəli futbolçu var. Buna görə rotasiyalara getməyə məcburuq. İlk yarıda oyunumuz alınmadı. İkinci hissədə daha yaxşı oynadıq.

- Qarşıda "Turan Tovuz" və "Qarabağ"la oyunlar var. Komandada nəticəylə bağlı psixooloji gərginlik olacaq*

- Gərginliyin olmağı normaldı. Çünki futbol stressli idman növüdü. Bizi nəyin gözlədiyini bilirik. Gərək iddiasız olsan ki, belə qrafikə girməyəsən. Komanda hər iki “cəbhə”də öz iddiasını göstərəcək.

- Turnir cədvəlində üçüncü yeri itirmək təhlükəsini hiss etmirsiniz ki, ən yaxın izləyiciniz “Turan Tovuz” həmin pilləni əlinizdən alar?

- Bizi düşündürən "Turan Tovuz" deyil, özümüzük. Başqa komandanın nəticəsinə görə xoşbəxtlik axtarmaq istəmirik. Hər şey özümüzdən asılıdır.

- "Kəpəz" ən çox qol buraxan komandadır. Onlara qol vura bilməməyinizin səbəbi nədir?

- Mən o fikirdə deyiləm. "Kəpəz" qış fasiləsindən sonra iddialı klomandalardan xal alıb. Çempionatımızda zəif komanda anlayışı yoxdu.