Ziya Rəcəbov "Turan"ın Zaqrebdə də sözünü deyəcəyinə əmindi: "Qızlarımıza inanıram, orda da qalib gələcəyik"

"Turan" voleybol üzrə CEV Çempionlar Liqasının II təsnifat mərhələsinin ilk matçında “Mladost” (Xorvatiya) üzərində inamlı qələbə qazanıb. 

Presssport.az-ın Tovuza ezam olunmuş əməkdaşı xəbər verir ki, qarşılaşmadan sonra komandanın baş məşqçisi Ziya Rəcəbov oyunla bağlı fikirlərini bölüşüb və sualları cavablandırıb:

• - Təbii ki, birinci set kəşfiyyat xarakterli olduğuna görə gərgin mübarizə şəraitində keçdi. Amma asan qələbə qazandığımızı deməzdim. Rəqibi çox yaxşı təhlil etmişdik. Gənc komanda olmalarına baxmayaraq, çox ruhlu, mübarizə aparmağı sevən heyətdi. Hələ heç nə bitməyib. İnşallah, Zaqrebdə də sözümüzü deyəcəyik. Bu qələbə hələ o demək deyil ki, turu keçmişik. Qızlarımıza inanıram, orda da qalib gələcəyik. Əvvəl dediyim kimi, təcrübə öz sözünü dedi. Çox yaxşı oyunçularımız var. Ehtiyatda olan voleybolçularımız da təcrübəlidi və əsas heyətin arxasınca gəlir. Bizdə A, yaxud B komandası və ya "əsas və ehtiyat heyət" anlayışı yoxdu. Hamısına uğurlar arzulayıram, qızlarımı bağrıma basıram. Doğrudan da, çox yaxşı oyun nümayiş etdirdilər. Düzdür, ev tapşırıqları o qədər də yaxşı alınmadı, amma eybi yoxdu, inşallah, düzələcək. Voleybolçuların bir-birlərinə alışmaqları üçün zaman lazımdır. Bütün voleybolsevərləri və "Turan" azarkeşlərini qucaq dolusu salamlayıram və təşəkkür edirəm".

- Rəqibin ən təhlükəli oyunçusu 5 nömrə idi. Cavab qarşılaşmasında onu zərərsizləşdirmək üçün xüsusi hazırlıq görəcəksiniz?

- Əlbəttə. Bu dəfə istədiyimiz kimi alınmadı, amma yenə də qarşısını 3-4 dəfə ala bildik. Yenə üzərində işləyəcəyik. Vaxt azdır, lakin götür-qoy edib çatışmazlıqları aradan qaldıracağıq.

- Üçüncü setdə komanda hesabda geriyə düşdü, lakin sonra toparlanmağı bacardı. Bu geridüşmə yorğunluqla bağlı idi?

- Yorğunluq deməzdim. 16 xaldan sonra asan qələbə qazanmaq hissiyatı yarananda qızlarda hər zaman müəyyən arxayınlaşma olur. Ona görə də toparlanmaq bir qədər çətinləşir. Amma yenə də təcrübə öz sözünü dedi. Yekunda setin qalibi bizim komanda oldu.

- Azarkeşlər və arenada olan ümumi ab-hava necə idi?

- Çox möhtəşəm idilər! Tovuz camaatına buradan qucaq dolusu salamlar göndərirəm. Azərbaycanda belə azarkeş dəstəyini vaxtilə "Rabitə" və "Azərreyl"də görmüşdüm. İndi isə "Turan"da gördüm. Möhtəşəm idilər, çox sağ olsunlar!

- Cavab qarşılaşmasında "Turan"ın heyətində hər hansı dəyişiklik gözlənilir?

- Hər an dəyişiklik ola bilər. Çünki qeyd etdiyim kimi, bizdə birinci və ya ikinci komanda anlayışı yoxdur. Meydana birinci heyət də çıxa bilər, ikinci də, heç bir fərqi yoxdur. Bu gün dəyişikliklərdə də gördünüz ki, oyuna girənlər eyni səviyyəni qoruyub saxlayır.