"Təəssüflənirəm ki, 3 xal qazana bilmədik" - Bağırov

Araz-Naxçıvan" Premyer Liqanın 27-ci turunda öz meydanında "Qəbələ" ilə 1:1 hesablı heç-heçə edib.

Presssport.az xəbər verir ki, Muxtar Respublika təmsilçisinin baş məşqçisi Azər Bağırov oyundan sonra keçirilən mətbuat konfransına görüş haqda danışmaqla başlayıb.

- Oyuna yaxşı hazırlaşmışdıq. Qırmızı vərəqəyə qədər oyun yaxşı gedirdi. Futbolda belə şeylər olur. Təəssüflənirəm ki, 3 xal qazana bilmədik. 3 xal bizim üçün çox vacib idi. "Qəbələ"yə uğurlar arzulayıram.

- Müdafiədə olan problemlərin səbəbi nədi?

- Eyni oyunçu həm qırmızı vərəqədə, həm də qolda rol oynadı. Futbolçuya çox söz demək onu daha da “sındırmaq”dı. Yaddan çıxarmaq lazımdır. Kim istəyər ki, səhv etsin?

- Avrokuboklar uğrunda mübarizəniz davam edir?

- 32 xalımız var. Yuxarıdan 8 xal geridəyik. Hər an hər şey dəyişə bilər. Qarşıda 9 oyun var.

• Momammed Kadiri əvvəlki performansından uzaqdı. Bunun səbəbi nədir?
• Heyətimiz elə də geniş deyil. Bu gün hər kəs bizim üçün əsas heyətin oyunçusudurş. Kadiri bu gün dəqiq deyil, sabah dəqiq ola bilər. Dua edək ki, növbəti oyunlarda qol vurar.

- Avrokuboklara vəsiqə qazanacağınıza inanırsınız?

- Bu gün hesabda öndə idik. Kim deyərdi ki, azlıqda qalacağıq, qapımızda özümüz qol epizodu yaradacağıq? Futbolun yazılmamış qanunları var. Hər an hər şey ola bilər. İki qələbədən sonra ilk “3-lük”də ola bilərsən. Əlimizdə olan “material”a uyğun hərəkət edirik. Pis futbol oynamırıq. 

- Azlıqda qalmaq ehtimalına hazırlaşmamışdız?

- Düşünmürəm ki, hansısa məşqçi heyəti quranda qırmızı vərəqəni nəzərə alır. Sadəcə, qırmızı vərəqədən sonra alternativləri fikirləşir. Azlıqda qalandan sonra müdafiəyə çəkilirsən.