Millimizin sabiq baş məşqçisi dünyanın ən yaxşı müdafiəçiləri sırasında yer alıb

Azərbaycan millisinin sabiq baş məşqçisi Karlos Alberto Torres dünya futbolunun ən yaxşı müdafiəçiləri sırasında göstərilib.

Presssport.az xəbər verir ki, siyahını Böyük Britaniyanın nüfuzlu "Give me Sport" nəşri tərtib edib.

Belə ki, 2016-cı ildə dünyasını dəyişmiş braziliyalı keçmiş futbolçu 9-cu sırada yer alıb.

Birinci pillədə Almaniya millisinin və "Bavariya"nın əfsanəvi oyunçusu Frans Bekkenbauer qərarlaşıb. İtaliya yığmasının və "Milan"ın sabiq üzvü Paolo Maldini 2-ci, Milan təmsilçisinin digər sabiq üzvü Franko Barezi 3-cüdü.

Növbəti pillələrdə Bobbi Mur, Qaetano Şirea, Alessandro Nesta, Markos Kafu, Serxio Ramos, Karlos Alberto Torres və Fabio Kannavaro yer alıb.

Xatırladaq ki, Torres 2004-05-ci illərdə millimizi çalışdırıb. O, 1970-ci ildə Braziliya yığmasının kapitanı kimi dünya çempionu olub.