"Bizim üçün çox çətindi, zədəli oyunçularımız çoxdur, çalışırıq ki, bu durumdan çıxaq" - "Neftçi"nin məşqçisi

"Neftçi" Misli Premyer Liqasının 29-cu turu çərçivəsində səfərdə "Şamaxı"nı 2:0 hesabı ilə məğlub edib.

Presssport.az xəbər verir ki, "ağ-qaralar"ın məşqçisi Mübariz Orucov matçdan sonra keçirilən mətbuat konfransına qələbəni şərh etməklə başlayıb. 

- Azarkeşlərimizə təşəkkür edirəm. Bizə həmişəki kimi dəstək oldular. 7-8 oyunçunun xidmətindən məhrum idik. Bəzi futbolçularımız öz mövqeyində çıxış etmirdi, heyətdə rotasiyalar etmişdik. Buna baxmayaraq, yaxşı mübarizə apardılar. Onlara təşəkkür edirəm.

- Zədəli futbolçulardan kimlər sizin üçün mövsümün matçı olacaq "Sabah"la cavab yarımfinal matçına kimi hazır olacaq?

- Bəzilərində yüngül zədədir, bəzlilərində ağır. İndi nəsə demək olmur. Çalışacağıq ki, əlimizdə olan futbolçulardan istifadə edib meydana qələbə üçün çıxaq.

- Bu gün zədələnərək əvəzlədiyiniz Emil Səfərovun zədəsi ciddidi?

- Onun çiynində problem var. Emil də zədəlilər sırasına qoşuldu. Rafael Quzzo da uzun müddətdir oynamırdı. Bu gün o da zədələndi. Bizim üçün çox çətindi, zədəli oyunçular çoxdu, çalışırıq ki, bu durumdan çıxaq.

- "Sabah"ın baş məşqçisi Vasili Berezutski Elvin Camalovu qeyri-peşəkar davranış sərgiləməkdə ittiham edib. Buna münasibətiniz necədi?

- Oxumamışam, məlumatım yoxdu. Bilmirəm nədən danışıb, Camalovun hansı hərəkətini nəzərdə tutur. Bu üzdən nəsə deməyim düzgün olmaz.