"Sumqayıt"da zədəlilər: birində ciddi problem olmadı, digəri mövsümü bitirir

“Sumqayıt” qış hazırlığını Türkiyənin Antalya bölgəsində davam etdirir. Baş məşqçi Samir Abasov üçün əsas sevindirici məqam konqolu hücumçusu Kasimir Ninqayla bağlıdı. Belə ki, klubun mətbuat xidmətinin rəhbəri Zaur Xudiyevin Presssport.az-a verdiyi məlumata görə, adıçəkilən legionerin zədəsi ciddi olmayıb və təlim-məşq toplanışında iştirak edir: “Düzdür, Ninqa kimi zədəli olan İsa Suliman Antalyada ilk məşqdə iştirak etmədilər. Amma artıq komandaya qoşulublar. Ümumiyyətlə, Kristian Velinovski və Vüqar Mustafayev xaricində oyunçularımızn hamısı artıq toplanışdadı. Əvəzedici heyətimizdən 5-6 futbolçu da əsas komandanın Antalyadakı hazırlıq prosesinə cəlb olunub”. Məlumdu ki, Mustafayevlə Velinovski əməliyyat olunaraq Türkiyəyə gətirilməyiblər. Adıçəkilən yarımmüdafiəçilərdən legionerin problemi daha ciddi olduğundan – ayağı qırıldığından, onun bu mövsüm bir daha meydana çıxmayacağı gözlənilir. Xudiyevi dinləyək: “Bəli, onun cari mövsümdə oynaması çətin məsələdi. Hazırda Vətəni Şimali Makedoniyada olan Kristian fevralda Sumqayıta gələcək. Bundan sonra yavaş-yavaş bərpa prosesi start götürəcək – hələ ilk olaraq yeriməyə başlamaq, sonra yavaş-yavaş kiçik hərəkətlər, məşqlər. Bunlar yəqin, mövsümün sonuna çatmaz. Vüqar isə artıq fevralda məşqlərə başlayacaq. Onun artıq III dövrədə oynaması gözlənilir”. Xatırladaq ki, “Sumqayıt” yanvarın 17-dək davam edəcək Analya toplanışında 2 yoxlama matçı keçirəcək. Bunlar yanvarnı 12-də Rumıniyanın “Hermanştadt”, 16-da Özbəkistanın “Soqdiana” klubuyla oyunlar olacaq. MEHMAN SÜLEYMANOV