"Qəbələ"də "250"yə çatdı - 2-ci rekordçudu

Asif Məmmədov “Qəbələ”də 250-ci oyununu keçirib. 

Presssport.az xəbər verir ki, 38 yaşlı yarımmüdafiəçinin yubileyi Premyer Liqanın XXXIV turuna təsadüf edib. Komandanın kapitanı “Sabah”la ev matçında (2:0) meydana sonradan daxil olub.

Asif “Qəbələ” formasında keçirdiyi 250 oyunda 17 qol vurub. O, Premyer Liqada 195 matçda 13, Azərbaycan kubokunda 31 görüşdə 3, avrokubokların 24 qarşılaşmasında 1 dəfə fərqlənib.

Məmmədov “Qəbələ”nin tarixinə 250 və daha çox oyun keçirən 2-ci futbolçudu. Lider Urfan Abbasovun hesabında 303 matç var.

Asif “Qəbələ”nin heyətində 2007-ci il fevralın 12-də debüt edib. O, “İnter”lə səfər matçında (0:2) şans qazanıb.

2015-ci ilin yayından “Qəbələ”də çıxış edən yarımmüdafiəçi 2006/07 mövsümünün 2-ci yarısında da “qırmızı-qaralar”ın formasını geyinib.