"Güləşçilərimizin hər biri Paris Olimpiadasında yaxşı nəticə qazana bilər" - millimizin məşqçisi

“Bu yarışda əsas məqsəd idmançıların son durumunu öyrənmək idi”.

Presssport.az xəbər verir ki, bu fikirləri Azərbaycanın yunan-Roma güləşi millisinin məşqçisi Həsən Əliyev Macarıstanın paytaxtı Budapeştdə keçirilən reytinq turniri barədə danışarkən deyib.

Mütəxəssis 3 qızıl medal qazandıqları turnirin onlar üçün yaxşı keçdiyini bildirib: "Artıq olimpiadaya qısa müddət qalıb. Qeyri-olimpiya çəkilərindəki güləşçiləri də yoxlamalıydıq. Qarşıda dünya çempionatı olacaq. Onlar uzun müddət güləşmirdilər. Hazırda bizi yalnız təlim-məşq toplanışı, ardınca isə olimpiada gözləyir".

O, Fransanın paytaxtı Parisdə təşkil olunacaq Yay Olimpiya Oyunları barədə də danışıb: "Bizim 5 lisenziyamız var. Güləşçiləri bir-birindən ayırmaq istəmirəm. Bu elə yarışdır ki, həmişə sürprizlərlə doludur. Kimin hansı medalı qazanacağını öncədən proqnozlaşdırmaq olmaz. Güləşçilərimizin hər biri Parisdə yaxşı nəticə qazana bilər" (report.az).