"Əlimdə foto var, 1 santimetr ofsayd vardı, artıq bu gülünc qaydalardan çox yorulmuşam" - Yulmann

Danimarka millisinin baş məşqçisi Kasper Yulmann AVRO-2024-ün 1/8 finalında Almaniya yığmasına məğlub olaraq (0:2) mübarizəni dayandırmaları barədə danışıb.

Presssport.az xəbər verir ki, danimarkalı mütəxəssis ilk növbədə rəqibi qələbə münasibətilə təbrik etmək istədiyini və son illərdə böyük komandalardan biri olduqlarını göstərdiklərini söyləyib: "Lakin çatışmayan cəhətlərimiz var. Daha çox qol imkanları yaratmalıyıq və əlimizə düşən fürsətləri boşa verməməliyik. Düşünürəm ki, daha dəqiq oynasaydıq, məğlub olmazdıq".

Yulmann görüşdəki hakim qərarlarından narazı qaldığını deyib: "İlk 15 dəqiqə təzyiq altında qaldıq, bu, sırf sağ qalmaq uğrunda mübarizə idi. Bundan sonra oyun bərabərləşdi. Hər şey 2 VAR qərarı ilə müəyyənləşdi. Əlimdə foto var, 1 santimetr ofsayd vardı. Məlumat baxımından bunun mənası yoxdu, VAR-dan belə istifadə etməməliyik. Bir neçə dəqiqə sonra penalti təyin olundu. Artıq bu gülünc qaydalardan çox yorulmuşam. Müdafiəçilərimizdən belə qaçmağı tələb edə bilmərik, bu, qeyri-təbiidi. Bu qərarlar haqda nadir hallarda danışıram. Lakin bu oyunun taleyini belə yalnış qərarlar həll etdi”.