"Şerif"in baş məşqçisi "Zirə"ylə bağlı diqqətini çəkən məqama toxundu: "Bizə püşklə düşə biləcəyi ən ciddi rəqiblərdən biri idi"

"Şerif"in baş məşqçisi Yuri Qura klubunun rəsmi saytına onları "Zirə" ylə rəqib edən Avropa Liqasının I təsnifat mərhələsinin püşkatmasının nəticələri barədə danışıb.

Presssport.az həmin müsahibəni təqdim edir:

- Yuri Vladimiroviç, püşkatmanın nəticələrini şərh edin...

- Avropa Liqasında zəif komanda yoxdu. Azərbaycan “Zirə”si püşkatma yolu ilə bizə düşə biləcək ən ciddi rəqiblərdən biri idi.

- Azərbaycan komandalarında hansı güclü tərəfləri görürsünüz?

- “Zirə” ilə bağlı bir şeyi deyə bilərəm – komanda çox təşkilatlanıb. O, çempionatda az qol vursa da, az qol da buraxır. Rəqib haqda daha ətraflı məlumat toplayacağıq.

- İlk oyun evdə - müsbət, yoxsa mənfi?

- İndi səfərdə vurulan qollar heç bir rol oynamır. Başqa sözlə, ilk matçı harda keçirdiyinizi nəzərə alaraq, müsbət və ya mənfi cəhətlərdən danışmağın mənası yoxdu. Bu fərq artıq yoxdu.