Paris-2024-də Azərbaycana ilk medalı qazandıran: "Səhvlərə görə "qızıl"ı əldən verdim"

“Məqsədim Vətənə çempion olaraq qayıtmaq idi. Amma müəyyən səhvlərə görə qızıl medalı əldən verdim”.

Presssport.az xəbər verir ki, bunu Fransada keçirilən Paris-2024 Yay Paralimpiya Oyunlarında bürünc medal qazanan Azərbaycan parataekvondoçusu Sabir Zeynalov (58 kq) deyib.

K44 kateqoriyasında mübarizə aparan idmançımız 19 yaşında paralimpiadada mükafat əldə etməyin qürurverici olduğunu vuğrulayıb: "Yeni hədəflərim var. Dünya və Avropa çempionu olmaq, həmçinin Los-Anceles-2028 Paralimpiadasında qızıl medal qazanmaq istəyirəm. Dəstəyinə və diqqətinə görə cənab Prezident İlham Əliyevə, Birinci vitse-prezident Mehriban Əliyevaya, Gənclər və İdman Nazirliyinə, Milli Paralimpiya Komitəsinə, Taekvondo Federasiyası ilə Əmək və Əhalinin Sosial Müdafiəsi Nazirliyinə təşəkkürümü bildirirəm".

Xatırladaq ki, Sabir sentyabrın 8-də başa çatacaq paralmpiadada ölkəmizə ilk medalı qazandırıb.