Yubiley matçına doğru - "Spartak" son dəfə 36 il əvvəl Bakıda olub, "Neftçi" məğlub yola salıb

Moskva “Spartak”ı 36 illik fasilədən sonra Bakıda oyuna çıxacaq.

Presssport.az xəbər verir ki, bu, “Neftçi”ylə “Neftçi Arena”da yoldaşlıq görüşü olacaq.

Rusiya klubu onda da paytaxtımıza “ağ-qaralar”la oyun üçün gəlmişdi. Bu, SSRİ Federasiya Kubokunun yarımfinal matçı idi. 

1998-ci ilin oktyabrın 16-da o vaxt Vladimir Lenin adlanan, hazırkı Tofiq Bəhramov adına Respublika stadionunda keçirilən, Voljski şəhərindən olan Voldemar Medvetskinin idarə etdiyi, 12250 tamaşaçının izlədiyi matç “Neftçi”nin 2:1 hesablı qələbəsiylə yekunlaşıb. Bakılılar hər 2 qolu fasiləyədək vurub. Belə ki, hücumçu Nazim Süleymanov 9-cu dəqiqədə hesabı açıb, Yunis Hüseynov 34-cü dəqiqədə fərqi artırıb. Kostantin Beskovun baş məşqçisi olduğu moskvalılar 68-ci dəqiqədə hücumçu Fyodr Çerenkovun qoluyla hesab arasındakı fərqi minimuma endirsə də, bundan artığına gücü çatmayıb. 

Beləliklə, o vaxt Yuri Kuznetstovun baş məşqçisi olduğu "Neftçi" bu qələbə sayəsində həmin turnirin finalına çıxıb və Kişinyovda keçirilən həlledici matçda “Kayrat”a 1:4 hesabıyla uduzaraq titul qazanmaq şansını əldən verib.

Ümumiyyətlə, “Neftçi”ylə "Spartak" bütün turnirləri nəzərə alsaq, 59 dəfə görüşüb. Göründüyü kimi, bugünkü matç yubiley - 60-cı olacaq. Ən çox oyunlar təbii ki, SSRİ çempionatında olub- 50. Paytaxt təmsilçiləri SSRİ Kubokunda və "Birlik kuboku"nda hər birində 3 dəfə qarşılaşıb. İki matç müstəqillik dövründə yoldaşlıq görüşü və nəhayət, 1-i dediyimiz Federasiya Kubokudu.

Oyunların balansına nəzər salsaq, “Neftçi”nin 14, “Spartak”ın 33 qələbəsi var, 12 matç heç-heçə yekunlaşıb. Topların fərqi 106-52 moskvalıların xeyrinədi.