Tsxadadzanin Azərbaycanda başqa təklifi olub: "Hətta görüşmüşdülər də, sadəcə, bunu..."

“Tsxadadzeylə əvvəlki müqaviləsində şərtlər başqa idi, indi başqadı. Yeni gələndə onunla danışmışdıq və o vaxt da başa düşürdük ki, bir az vəziyyət ağırdı, komanda I Liqaya düşə bilər. Onda hər 2 hal üçün danışığımız olmuşdu ki, I Liqaya yollansaq, davam etmək ehtimalıyla bağlı söhbətləşmişdik". 

Bu fikirləri Presssport.az-a açıqlamasında I Liqaya düşən “Qəbələ”nin idman direktoru Səbuhi Səfiyarlı deyib. Gürcü baş məşqçi Kaxaber Tsxadadzeylə müqavilənin uzadılmasının detallarından danışan klub rəsmisi əməkdaşlığının davam etdirilməsiylə bağlı tərəflərin heç bir tərəddüdün olmadığını vurğulayıb: “Nə onda, nə də bizdə heç bir tərəddüd yox idi. Sadəcə, qışda bağladığımız 1,5 illik müqavilənin şərtləri başqa idi. İndisə yeni müqavilə imzalamışıq - 3 illik. Burda əsas fərq maddi şərtləriylə bağlıdı. Ondakı anlaşmanın müddəti indikindən xeyli az idi. İndi 3 illik bir şey fikirləşirik ki, buna görə bütün şərtləri bəri başdan danışdıq. Burda mükafatlar, fərqli şeylər vardı. 3 illik strategfiyamız var və onu həyata keçirmək üçün klub rəhbərliyi olaraq seçimimiz kimi Kaxanın üzərində dayandıq. Əlbəttə, Premyer Liqadan düşəndən sonra büdcəmiz fərqli olduğundan, o da maddi cəhətdən nələrəsə güzəştə getdi. Əslində, şifahi şəkildə 2 həftə danışıb razılaşmışdıq. Sadəcə, detallar qalmışdı".

Səfiyarlı 56 yaşlı Tsxadadzenin başqa təkliflərinin olduğunu gizlətməyib: “Hətta Azərbaycandan belə təklifi vardı. Görüşmüşdülər də. Sadəcə, bunu nəzkaət xətrinə etmişdi. Amma qərarı aydın idi ki, bizdə qalacaq. Həmin klubun adını deyə bilmərəm".