12 ildən sonra Mərdəkanda - "Qarabağ" bura son səfərində böyük məyusluq yaşayıb

Azərbaycan Kubokunun finalı 12 illik fasilədən sonra yenidən Mərdəkanda keçiriləcək.

Presssport.az xəbər verir ki, "Dalğa Arena" istifadəyə veriləndən sonra ilk mövsümdə - 2012-ci ilin mayın 17-də bu tirnirin həlledici matçı ora salındı.

Bakı derbisi - “Neftçi”ylə "Bakı"nın qarşılaşması ikincilərin 2:0 hesablı qələbəsiylə yekunlaşdı. Qolları legionerlər - isaniyalı hücumçu Koke (8-ci dəqiqə) və braziliyalı yarımmüdafiəçi Juninyo (27-ci dəqiqə) vurmuşdu. Bununla da Novruz Əzimovun baş məşqçidi olduğu komanda həmin mövsüm çempion olan həmşəhərlilərinin “qızıl dubl” etməsinə imkan vermədi.

“Dalğa Arena" adını dəyişərək sponsorun adını daşımağa başlayandan - “Liv Bona Dea Arena” adlanandan sonra ilk mövsümdə yenidən Kubokun finalını qəbul edəcək. Yenə rəqiblərdən biri - "Qarabağ" çempiondu ki, onun izləyicisi gümüş medalçı, hələ ki kuboka həsrət “Zirə”di.

Maraqlıdı ki, Qurban Qurbanovun komandası Mərdəkana son səfəri çox uğursuz alınmışdı. Bu, “Neftçi”ylə 2020/21 mövsümün son turunda 0:1 hesabıyla uduzaraq çempion ola bilmədiyi “qızıl oyun” idi. Ondan sonra isə 3 ildir “köhlən atlar”ın bu qəsəbə stadionuna yola düşmürdü. Halbuki, Premyer Liqaya 9 illik fasilədən sonra dönən “Araz-Naxçıvan” rəqiblərini burda qəbul etdi. Sadəcə, "Qarabağ"ın səfər matçları onun meydanında - əvvəlcə Tofiq Bəhramov adına Respublika stadionunda, ardından “Azərsun Arena”ya salındı.

Onu da bildirək ki, finalçılar görüşəcəkləri bu stadionda avrokubok matçları keçirib. “Zirə” ümumiyyətlə, qitəmiqyaslı turnirlərdə hələ ki yalnız Mərdəkanda oynayır.