“O "Neftçi" ilə indiki arasında böyük fərq var" - Lebon

“Neftçi”nin yarımmüdafiəçisi Kilan Lebon Presssport.az-a müsahibə verib.

Presssport.az həmin müsahibəni təqim edir:

- Azərbaycan Premyer Liqasının ilk turunda “Turan Tovuz”la görüşdə 1 xalla kifayətləndiniz. Qolsuz heç-heçəni necə şərh edərdiniz?

- Çətin oyun alındı. Rəqib yaxşı müdafiə olunurdu. Sona qədər rəqib müdafiəsini yarmaq mümkün olmadı. Təəssüf ki, lazım olan qolu vura bilmədik.

- “Neftçi” Ərzurum toplanışında ardıcıl qələbə qazanmaqla azarkeşləri ümidləndirmişdi. Amma çempionata qələbə ilə başlaya bilmədiniz. Bunu nə ilə əlaqələndirmək olar?

- Hazırlıq oyunları ilə rəsmi matçlar eyni deyil. Biz çalışacağıq ki, təlim məşq toplanışında etdiklərimizi rəsmi görüşlərdə də təkrarlayaq. “Turan Tovuz”la matçda tətbiq etmək istədiklərimiz bəzən alınırdı, bəzən yox.

- Yaxşı, belə deyək, əsl “Neftçi”ni görmək üçün neçə tur gözləmək lazımdır?

- Dəqiq cavab vermək çətindir. Mövsüm öncəsi yaxşı toplanış keçmişik. İnanıram ki, oyundan oyuna daha yaxşı vəziyyətdə olacağıq.

- Ötən mövsümlə müqayisədə “Neftçi”də nə dəyişib?

- Komandada ciddi dəyişikliklər olub. O komanda ilə indiki arasında böyük fərq var. Yeni baş məşqçi gəlib. Onun tapşırıqlarına, yeni sistemə uyğunlaşmaq üçün zamana ehtiyacımız var.

- Azarkeşləri ən çox maraqlandıran odur ki, “Neftçi” bu mövsüm “Qarabağ”a müqavimət göstərə biləcək?

- “Qarabağ”a qarşı yaxşı mübarizə aparsaq, çempion da ola bilərik. Mövsüm uzundur, hər şey ola bilər. Lakin indiki halda oyundan oyuna vəziyyətimizə baxmalıyıq.

- Rəqib qapıçı qazonun durumundan gileyləndi. Nəzərə alsaq ki, siz texnikalı futbolçusunuz, onda şikayətiniz daha çox olar...

- Əlbəttə, qazonun durumu yaxşı deyildi. Qapıçıdan hücumçuya kimi hamı üçün çətin idi. Belə qazonda oynamağı heç kim xoşlamaz, təkcə mən və rəqib qapıçı yox.

- Bu yaxınlarda ilk övladınız dünyaya gəldi. Ata olmaq həyatınızda nələri dəyişib?

- Çox şey dəyişib. Atalıq insanı daha məsuliyyətli olmağa vadar edir. Artıq ilk gündən övladının gələcəyini düşünməlisən. Üstəlik, elə davranmalısan ki, övladına nümunə olasan (futbolxeber.az).