Təbriz Həsənov: "Sevindirici haldı ki, "Sabah”ın Konfrans Liqasında qələbəsində 2 yetirməsi ən yaxşılardan idi"

“Yusif İmanov bizdə - “Vətən” Futbol Məktəbində 13-14 yaşından başlamışdı. Sonradan isə “Sabah” Futbol Akademiyası yarananda ora keçdi. Demək olar öz doğmamız, yetirməmizdi. “Sabah”ın bütün yaş qruplarında - 17, 19 yaşlılarda, əvəzedicilərdə oldu və ən nəhayət, əsas komandaya düşdü. Sevindirici haldı ki, bu gün Yusif kimi bizim yetirmə ”Makkabi"ylə ev matçının qəhrəmanı oldu".

Bu fikirləri Presssport.az-a açıqlamasında “Sabah”ın Futbol Akademiyasının aşağı yaş qrupları üzrə koordinatoru Təbriz Həsənov deyib.

Təcrübəli mütəxəssis Konfrans Liqasının II təsnifat mərhələsində Hayfa "Makkabi"sini keçmələrində qapıçı faktorunu xüsusi vurğulayıb: “Düzdü, qələbədə bütün komandaya “çox sağ ol” düşür. Amma mənə elə gəlir ki, Yusif İmanov həmin gün ən yaxşılardan idi. Baxmayaraq ki, komandamız qapısından 6 top buraxdı, amma Yusif bir neçə yüzdəüyz qol epizodunun qarşısını aldı. Ən əsası, oyunsonrası penaltilər seriyasında İmanovun o topu inamlı çıxarması - ”seyv"i elə bil ki bizim komandaya inam verdi, motivasiyasını artırdı. Görünən odur ki, Yusifin o topu çıxarmasından sonra rəqib komandaya psixoloji zərbə aldı və o üzdən son 2 topu kənara vurdular".

Həsənov digər yetirmələri olan gənc futbolçu - cinah yarımmüdafiəçisi Xəyal Əliyevin də avrokuboklarda uğurlar çıxışına sevinərək, onun soyuqqanlılığına xüsusi diqqət yetirib: “Təbii ki, Xəyal da bizə yaxşı tanışdı, Xaçmazdan ”Sabah" Futbol Akademiyasına qoşulmuşdu. Hətta bir ara Zaqreb “Dinamo”suna təlim-məşq toplanışna gedən uşaqlar içərisində idi, Xorvatiya paytaxtında hazırlıq keçdi. O da gələn kimi özünü yaxşı tərəfdən göstərdi, əsas komandanın məşqlərinə daha tez qatıldı. Sevindirici haldı ki, Konfrans Liqasında “Sabah”ın qələbəsində 2 yetirməsi ən yaxşılardan idi. Xəyalın Macarıstanda vurduğu qolu qeyd eləməmək mümkün deyil. Bakıdakı görüşdə isə Coy-Lens Mikelsin qolunda möhtəşəm ötürməsi yaddaqalan oldu. Doğrudan da hər 2 epizodda ustalıq nümayiş etdirdi. Vurduğu dəqiq penaltini də vurğulamalıyıq. Əvvəla, yaxşı ki baş məşqçi ona - gənc futbolçuya etimad göstərdi. Xəyal da öz növbəsində zərbəni çox soyuqqanlı, düz “9-luğ”a yönəltdi. Çox rahat idi penalti nöqtəsində. Təbii ki, hər ikisini təbrik edirəm və gələcək karyeralarında uğurlar arzulayıram. "Sabah"ın bu 2 yetirməsi hər 2 oyunda özlərini yaxşı tərəfdən göstərdi və mərhələ adlamağımızda böyük pay sahibidi".

Xatırladaq ki, 57 yaşlı Həsənov eyni zamanda “Vətən” Futbol Məktəbinin baş məşqçisidi.