Paris-2024: Taekvandoçumuz yarımfinala çıxdı, medala bir az da yaxınlaşdı

Azərbaycan taekvondoçusu Qaşım Maqomedov Fransanın paytaxtı Parisdə təşkil olunan Yay Olimpiya Oyunlarında növbəti görüşünü keçirib.

Presssport.az 58 kq çəki dərəcəsində yer alan idmançı 1/4 final mərhələsində ispaniyalı Adrian Visente ilə üz-üzə gəlib.

Rəqibinə 2:0 qalib gələn Maqomedov yarımfinala yüksəlib. Təmsilçimiz ilk hissədə 11:5, ikinci yarıda 13:11 hesabı ilə üstün olub.

24 yaşlı milliləşdirilmiş dağıstanlı legionerimizin yarımfinaldakı rəqibi Omar Salim (Macarıstan) - Vito Del-Akvila (İtaliya) cütünün qalibi olacaq.

Onu da bildirək ki, Maqomedov Avropa çempionudur (2023-cü il). O, həmçinin qitə çempionatında 1 bürünc, Avropa Oyunlarında 1 bürünc, İslam Həmrəyliyi Oyunlarında isə 1 gümüş və 1 bürünc medal qazanıb.

Qeyd edək ki, avqustun 11-də başa çatacaq Paris-2024-də indiyədək cüdoçularımız Hidayət Heydərov (73 kq) və Zelim Kotsoyev (100 kq) Olimpiya çempionu olub, boksçumuz Alfonso Dominqes (92 kq) finala yüksəlməklə ən azı gümüş mükafatı təmin edib.