"Vəziyyəti bu həddə futbolçular gətirib, onlar da durumdan çıxartmalıdı" - Adil Şükürov

Millətlər Liqasının əvvəlki 4 oyununda məğlub olan Azərbaycan millisi növbəti matçını noyabrın 16-da Estoniyaya qarşı keçirəcək. Bu rəqibinə Estoniyadakı qarşılaşmada uduzan (1:3) seçmənin Qəbələdəki oyunda nə ilə yadda qalacağı maraq doğurur. 

Presssport.az xəbər verir ki, tanınmış futbol mütəxəssisi Adil Şükürovla əlaqə saxlayıb seçmənin qarşıdakı görüşündən nə gözlədiyini soruşduq. 

Onun açıqlaması belə oldu: "Estoniya ilə oyun millimiz üçün çox önəmlidir. Bu oyun demək olar ki, böyük ölçüdə gələcəkdə nəyə ümid edə biləcəyimizi və futbolumuzun hansı səviyyəyə gəlib çıxdığını göstərəcək. Bundan başqa, yerli çempionatın hansı səviyyədə olduğunu aydın şəkildə görəcəyik. Bunu milliyə çağrılan futbolçuların hər biri yaxşı dərk edə bilsələr, oyuna motivasiya olacaqlar. Komandanın hər bir üzvü durumu dərk etməlidir ki, bu  gün Premyer Liqada oynayan 50-60 futbolçunun içindən seçiliblər. Onlar komandanın D Liqasına düşməsinin qarşısını ala biləcək futbolçulardır. Bütün futbol ictimaiyyətinin bu oyundan gözləntiləri böyük hesablı qələbədir. Əks halda, D Liqası bizi gözləyir. Komandanın aşağı liqaya düşməsindən danışırıqsa, burada artıq  heç bir meydan, heyət amilinin önəmi yoxdur. Bütün futbolçular maksimum bacarıqlarını meydanda göstərməklə qalib gəlməlidir. Vəziyyəti bu duruma bu futbolçular gətirib, onlar da bu vəziyyətdən çıxartmalıdırlar. 

Əvvəlki oyunlara baxanda görürük ki, komanda ələ düşən imkanları dəyərləndirə bilmir və qapımız qarşısında rəqibin azsaylı imkanlarının da qarşısını almaqda çətinlik çəkir. Komanda bu oyunda hücumda daha aqressiv olmalıdır və ələ düşən  imkanlardan maksimum yararlanmalıdır. Müdafiədə isə maksimum az səhv etməliyik. Fernandu Santoşun heyətlə bağlı yəqin ki, planları var və o da anlayır ki, bu qarşılaşma finala bərabər oyun olacaq".

Qeyd edək ki, Azərbaycan milli komandası C liqasının I qrupu çərçivəsində noyabrın 16-da, saat 18:00-da Qəbələ şəhər stadionunda Estoniya yığması ilə, noyabrın 19-də isə Bakı vaxtı ilə saat 23:45-də “Strouberri Arena”da İsveç seçməsi ilə qarşılaşacaq (fanat.az).