Abasov qış fasiləsində gedən futbolçuların olacağını açıqlayıb: "Bəyəndiyimiz və danışıqlar apardığımız futbolçular var"

"Neftçi"nin baş məşqçisi Samir Abasov jurnalistlərə açıqlama verib. Presssport.az xəbər verir ki, 46 yaşlı mütəxəssis qarşıdakı oyunlar və komandanın durumundan danışıb: "Qış fasiləsinə qədər son iki oyunumuz qalıb - biri evdə olacaq, digərisi də səfərdə. İşimiz tam düzəlməsə də, ən azı əhval-ruhiyyəmizi bu iki oyunda maksimal nəticə götürərək düzəltmək istəyirik.

Qış fasiləsində yaxşı motivasiya ilə hazırlaşmaq üçün son iki matç vacibdi. Baxmayaraq ki, nəticələrimiz ürəkaçan deyil, hətta bərbaddı. Amma bu, bizim işimizə qətiyyən mane olmur. Tam gücümüzlə işləyirik. Artığını etməyə çalışırıq. Çünki bilirik ki, vəziyyətdən çıxmalıyıq. Bunu da ancaq çox çalışaraq edə bilərik. Həmişəki proqramımızla davam edirik". 

Abasov qış “transfer pəncərəsi”nə olan planlar haqda da söz açıb: "Gedən futbolçularımız da olacaq. Çalışacağıq ki, yeni oyunçular da gətirək. Bəyəndiyimiz və danışıqlar apardığımız futbolçular var. İnşallah ki, yaxşı nəticələnər və gətirmək istədiyimiz oyunçuları gətirə bilərik". 

Baş məşqçi qış təlim-məşq toplanışında səfərə getməyəcəklərini qeyd edib: "İstirahətdən sonra öz bazamızda yığışacağıq. Heç bir səfərə getməyəcəyik. Meydançamız və şəraitimiz imkan verir ki, burda hazırlaşaq. Qışdan əvvəl və ya sonra gözləntilərimiz dəyişməyəcək. Məğlub olanda belə vəziyyətdən nəticə çıxarmağa çalışırıq. Bilirik ki, bu həftə uduzub, gələn həftə hər şey mütləq düzələcək deyə bir şey yoxdu. Düşdüyümüz vəziyyət elədir ki, çətinliklərlə çıxacağıq. Ümidlərimiz böyükdü".