"Barselona" tarixində 100-cü kubokunu qazanıb

"Barselona" tarixində 100-cü kubokunu qazanıb.

Presssport.az xəbər verir ki, bu, ötən gün İspaniya Super Kubokunun finalında "Real"a qarşı oyunda gerçəkləşib.

Belə ki, Səudiyyə Ərəbistanının Ciddə şəhərində baş tutan görüşdə rəqibini 5:2 hesabı ilə məğlub edən "Barselona" Kataloniyada keçirilən turnirlər nəzərə alınmadan tarixində 100-cü kubok qələbəsinə imza atıb.

İspaniya çempionatının 27 qat qalibi olan komanda ölkə kubokunu 31, Super Kuboku 15, Eva Duarte Kubokunu 3, İspaniya Liqa Kubokunu 2 dəfə başı üzərinə qaldırıb. Bundan əlavə, Kataloniya təmsilçisi UEFA Çempionlar Liqasını 5, Kubok Kubokunu 4, Avropa Super Kubokunu 5, Yarmarkalar Kubokunu 3, klublararası dünya çempionatını 3, Latin Kubokunu 2 dəfə qazanıb.

"Barselona"nın Kataloniya regional turnirlərində 33 qələbəsi var.

Onu da bildirək ki, hazırda La Liqada 38 xalla 3-cü pillədə qərarlaşıb.