Sumqayıtdan Mərdəkana 274 gün - yalnız "Neftçi" qaldı

“Zirə” Premyer Liqada bu mövsüm ilk böyükhesablı qələbəni qazanıb.

Presssport.az-ın araşdırmasına görə, Rəşad Sadıqovun komandası çempionatda son dəfə bunu keçən mövsüm son turda “Kapital Bank Arena”da reallaşdırmışdı.

Belə ki, “Sumqayıt”la səfər matçında da “qartallar” 3:0 hesablı qələbə qazanmışdı. Budəfəsə - fevralın 25-də zirəlilər “Araz-Naxçıvan”ı Mərdəkanda həmin hesabla yendi. 

Hər iki 3:0-da “Zirə”nin hücumammeyli yarımmüdafiəçisi Rəhim Sadıxov fərqlənib. Belə ki, o, "Sumqayıt"a, “Araz-Naxçıvan”a 1 qol vurub.  

“Kapital Bank Arena”dakı 3:0-ün 2023-cü ilin mayın 27-də qeydə alındığını nəzərə alsaq, Premyer Liqada 273 gündən sonra darmadağına imza atan “Zirə”nin cari mövsümdə böyükhesablı qələbəsi Azərbaycan kubokunda olmuşdu. Bu, “Səbail”lə Zirədəki 1/4 final mərhələsinin cavab görüşündə məhz 3:0 hesabıyla olmuşdu. 

Onu da bildirək ki, Premyer Liqa iştirakçıları arasında böyükhesablı qələbəsi olmayan 1 komanda qaldı. Bu, 3-cü pillədə gedən “Neftçi”di. Böyükhesablı qələbə sayında da lider çempionatın lideri “Qarabağ”dı - 5. Sonrakı yerlərdə hərəyə 3 belə qələbəsi olan “Turan Tovuz”la “Səbail” gəlir. “Sumqayıt”, “Araz-Naxçıvan”, “Qəbələ”, "Sabah" və "Kəpəz"in də “Zirə” kimi 1 böyükhesablı qələbəsi var.