"Qorxduğumuz başımıza gəldi" - Ayxan Abbasov

"Turan Tovuz"un baş məşqçisi Ayxan Abbasov Premyer Liqanın 25-ci turunda səfərdə "Zirə" ilə 1:1 hesablı heç-heçə etdikləri matçından sonra mətbuat konfransı keçirib.

Presssport.az xəbər verir ki, Qərb təmsilçisinin çalışdırıcısı keçirilən öncə qarşılaşma haqda danışıb.

- Çətin səfər idi. "Zirə"yə onun meydanında qalib gəlmək üçün çox əziyyət çəkmək lazımdı. Azarkeşlərimizə təşəkkür edirəm. Oyun baxımından üstünlük bizdə idi. İlk dəqiqələrdə qol vurduq. Birinci hissədə yüz faizli iki epizoddan yararlana bilmədik. Zədələrdən və qırmızı vərəqədən sonra bilirdik ki, rəqib ikinci yarıda dəyişikliklər edəcək və bizi əks-hücumlarda yaxalayacaq. Qorxduğumuz başımıza gəldi. Standart vəziyyətdə səhv etdik və penalti oldu. Bundan sonra qol epizodlarımız var idi. Çempionat gərgin keçir, hər xal vacibdir.

- Qapıçınız Aydın Bayramovun durumu necədi?

- Zərbə üz nahiyəsinə olmuşdu. Oynamaq istədi. Sonra başı gicəlləndi. Paltardəyişmə otağında pis deyildi.

- Son nöqtəni qoya bilməməkdə problem nədi?

- Bu gün bizim də itkilərimiz var idi. Aleks Souza zədəli idi, bir məşq etmişdi. Riskə getdik, onu meydana buraxdıq. Denis Marandiçinin yoxluğu təsir etdi. O oynayanda cinahdan asmalar daha yaxşı olur. Rəqib yaxşı müdafiə olundu. "Zirə" çempionatda ən az qol buraxan komandasıdı. Rəşad Sadıqov komandanı hər rəqibə görə hazırlaya bilir. Bir az da yaxşı ola bilərdik. Bunun üçün çalışmaq lazımdı.

- Bu oyunu "Zirə" ilə kubok matçı ilə müqayisə etmək olar? Onda da ilk hissədə hesabı açdınız, sonra qol epizodlarını boşa verdiniz və üstünlüyünüzü artıra bilməyərək yekunda qələbəni əldən verdiniz….

- Kubok görüşündə biz qol vurandan sonra "Zirə"nin böyük təzyiqi oldu. Bu gün isə qoldan sonra oyun nəzarətimizdə idi. "Zirə" ilə matçlarımız həmişə maraqlı keçir. Bir-birimizə qarşı taktiki savaş gedir.

- İsmayıl Zülfüqarlı sol cinahda nə dərəcədə effektiv oldu?

- Bu gün orada oynayacaq ən real futbolçumuz o idi. Slavik Alxasov da zədəlidi. İsmayıl əvvəlki klubunda sol cinahda oynayıb, təcrübəsi var. Pis çıxış etmədi.