Azər Bağırov: "Sağ olsun hakimlər, yaramızın üstünə duz tökdülər"

“Araz-Naxçıvan”ın baş məşqçisi Azər Bağırov Premyer Liqasının 25-ci turunda səfərdə "Sabah"a 0:2 hesabı ilə məğlub olduqları matçdan sonra keçirilən mətbuat konfansı keçirib.

Presssport.az xəbər verir kİ, 43 yaşlı mütəxəssis öncə matçla bağlı danışıb. 

- Uduzanda çox şeydən danışmaq olmur, səhvləri komanda ilə müzakirə etməlisən. Meydanda görmək istəmədiyimiz hallar var. Futbolçularla danışmışdıq ki, rəqib əks-hücumda daha çox olacaq. Amma meydanda tam fərqli şeylər gördük. Fasilədən sonra üstünlüyümüz olsa da, qol vura bilmədik. Sağ olsun hakimlər, yaramızın üstünə duz tökdülər.

- Digər komandalar heyətin kasadlığı ilə bağlı şikayət edirdilər. Sizdə vəziyyət necədir? Heyətlə bağlı probleminiz var?

- Neçə oyundur ki, hakimlər barədə danışmaq istəmirəm. "Səbail"lə oyundan bu yana qeyri-adi ofsayd xətti çəkilir...Cərimə meydançasında müdaxilədə şaqqıltı səsi yanımıza qədər gəldi. Amma deyirlər ki, topa oynadı. Bəhanələr gətirən adam deyiləm. Əlində “material” varsa, ondan maksimum istifadə etməlisən. Bu gün əlimizdə yetəri qədər “material” var. Sadəcə qol epizodlarını dəyərləndirə bilmirik. Səhvlərimizin üzərində işləməliyik.

- Digər həmkarlarınız hakimlər haqda danışır. Düşünmürsüz ki, səssiz qaldığınız üçün əleyhinizə qərarlar olur?

- Həmkarlarımın işinə qarşımaq istəmirəm. Mövsümün əvvəlində hakimliklə bağlı çox danışdılar. Kimlər ki, danışdı, bu gün onlara simpatiya var. Biz də futbola baxırıq. Hakimlərin insafına buraxıram. VAR-da da ancaq bir adamdı - Rəşad Əhmədov. Ancaq o, VAR-da oturur. Azərbaycanda başqa hakim yoxdur yəqin ki. Ya VAR-da olur, ya da meydançada.

- Bu cür idarəetmə bəlkə hansısa planın tərkib hissədidi?

- Kadiri ilə Ayaz Quliyev hava mübarizəsinə qalxır, bizim oyunçuya sarı vərəqə verir. Eə bildim danışdığı üçün sarı vərəqə göstərdi. Dördüncü hakim deyir ki, kontakta görə verdi. Çox gülüncdü. Ən vacib oyunçulara sarı verəndə o deməkdir ki, bir az "xod"unu al. Bununla da futbolçunu "sındırırlar". Gənc hakimlərə baxanda nə etmək istədiklərini bilirik. Tempi salırlar. Çox şeylər var, danışmaq istəmirəm. Adam danışdıqca lap batır. Özləri bilər. Kim necə hakimlik edirsə, özü cavab verəcək.