"Bayer"lə qarşı bu dəfə əvvəlki matçlardan daha yaxşı oyun göstərə bilərik" - Bədavi Hüseynov

"Sabah Avropanın hazırda ən yaxşı komandasına qarşı oynayacağıq. Yaxşı oyun göstərmək istəyirik. Son iki matçdan da çox gücü "Bayer"lə görüşdə sərf etməliyik. Psixoloji cəhətdən böyük təzyiq yoxdu. Çünki onlara qarşı bu mövsüm iki dəfə oynamışıq. Baxımlı, yaxşı futbol üçün ən yaxşısını edəcəyik".

Presssport.az xəbər verir ki, bu sözləri "Qarabağ"ın futbolçusu Bədavi Hüseynov Avropa Liqasının 1/8 final mərhələsinin "Bayer"lə Bakıdakı oyunömcəsi mətbuat konfransında deyib.

Təcrübəli müdafiəçi ardından jurnalistlərin suallarını cavablandırıb.

- "Braqa" ilə Bakıdakı görüşdəki ötürməni necə xatırlayırsan? Həmin anda nə düşündün?

- Bir anda gələn qərar idi. Gördüm ki, Nəriman Axundzadə irəlidə dayanıb. Yaxşı ki, baş hakim oyunu dayandırmadı. Şükürlər olsun ki, hər şey yaxşı alındı. Bunun üzərində çox dayanmaq istəməzdim. Komanda yaxşı mübarizə apardı. Hamımızın böyük, gözəl qələbəsi idi.

- Bir neçə gün əvvəl "Qarabağ" FK 30 il səfərdə" filmi göstərildi. Bu film "Qarabağ"ın "Bayer"lə oyunu öncəsi motivasiya verəcək? Komanda daxilində b-hava necədi?

- Filmi çox bəyəndim. Motivasiya sarıdan filmin dəyəri yüksəkdi. "Qarabağ" adi klub deyil. Bu filmdən sonra dünyaya nümayiş etdirməliyik ki, "Qarabağ"ın necə tarixi var. Yaxşı motivasiyadı.

- Sabah Julio Romao və Elvin Cəfərquliyevin yoxluğu nə dərəcədə hiss oluna bilər?

- Komandamızda hər bir oyunçunun keyfiyyəti yüksəkdi. Bizdə bir futbolçu olmayanda, digəri onu keyfiyyətli şəkildə əvəz edir. Bəli, yoxluqları hiss ediləcək. Amma meydana kim çıxsa, ən yaxşısını etməyə çalışacaq.

- "Bayer"ə qarşı qrupdakı matçlarda oynamısınız. Rəqib ilk növbədə nəyi bağışlamır?

- Həmin oyunda öz səhvlərimizi gördük. Bu cür rəqiblər sənin dərhal asan yerlərini göstərir. Onları analiz etmişik. Son matçlar bizə daha çox motivasiya verib. Bu dəfə onlarla əvvəlki görüşlərdən daha yaxşı oyun göstərə bilərik. Hansısa anlarda eyni səviyyədə oynamışdıq. Axırıncı oyundan sonra səviyyəmiz də qalxıb. Sabah səhvlərə yol verməməyə, inamlı oynamağa çalışacağıq ki, yaxşı oyunu yaxşı nəticə ilə başa vuraq.