Qurban Qurbanov: "Özümə görə təəssüflənmirəm, futbolçularıma, azarkeşlərimizə görə üzülürəm"

"Qarabağ" Avropa Liqası 1/8 final mərhələsinin cavab oyununda səfərdə "Bayer"ə 2:3 hesabı ilə məğlub olaraq turnirdə mübarizəni dayandırıb.

Presssport.az xəbər verir ki, Azərbaycan çempionunun baş məşqçisi Qurban Qurbanov matçdan sonra keçirilən mətbuat konfransına oyun haqda danışmaqla başlayıb.

- Futbolçularıma təşəkkür edirəm. Sona kimi mübarizə apardılar, çox güc sərf etdilər. Xabi Alonsonu təbrik edirəm. Ona uğurlar arzulayıram.

- Bu cür rəqiblərlə mübarizə aparmaq üçün Azərbaycan futbolunda nə çatmır?

- Burda çox müzakirə etmək düzgün olmaz. Şansımız var idi. Bundan istifadə etmək istəyirdik. Belə oyunlarda sona qədər dözmək üçün bu mərhələlərə daha çox çıxmalıyıq. Bu cür rəqiblərə qarşı fiziki cəhətdən hazır olmalıyıq. Bizim klubun, Azərbaycan çempionatının yaşı çox azdı. Bizə turnirlərdə belə iştirak etmək lazımdı ki, bir neçə komandamız inamlı olsun. Bura kimi gəlmişiksə, çalışmalıyıq ki, əlimizə düşən şansdan maksimum istifadə edək. Görünür ki, üzərimizdə daha çox işləməliyik. Belə oyunlarda bir səhv və ya qırmızı vərəqə belə vəziyyətə gətirib çıxarır. Ümumən hər şeyə real baxmaq lazımdı. Bu gün bizim futbolun səviyyəsi ilə "Bayer" arasında fərq böyükdü. Buna baxmayaraq, futbolçularımız rəqibdən çəkinmədilər. Bütün klublarımızın səviyyəsini daha da yaxşılaşdırmaq lazımdı. Bir yox, bir neçə komandamız bu turnirlərdə iştirak etsə, inam daha da çoxalacaq.

- Uğurlu keçən bu mövsüm sizə və komandaya nə öyrətdi?

- Böyük təcrübə oldu. Belə oyunlar həm mənə, həm futbolçulara, həm kluba böyük təcrübə verir. Bir daha böyük futbolun hansı səviyyədə olduğunu canlı görürük. Həm burda, həm Bakıda ilk qolu vurmaq bəs eləmədi. "Bayer" istənilən komandaya 2-3 qol vura bilər. Mənim üçün vacib olan futbolçuların bu sürəti, dinamikanı görməsidi. Bəzən futbolçuya təzyiq az olanda böyük futbol haqda düşünmür. Tək məşq etməklə hər şey həll olunmur. Düşünməliyik ki, harda, hansı şəraitdə məşq edirik. O qədər şeylər var ki…Bura səfər edəndə, "Bayer"in bazasında olanda çox şeyləri qeyd etdim. Bunları gələcəkdə bizdə də etməyə çalışacağıq. Bir daha gördüm ki, bu gün düşündüklərim bəs etmir. Təcrübəmi, elmimi, biliyimi daha da artırmalıyam

- Heyətinizin bu səviyyədə oyunlar üçün kasad olduğunu düşünmürsüz?

- Hər şeyə real baxmaq lazımdı. Bəlkə bundan bir az artığına gücümüz çatardı. Maksimum çalışırıq ki, iki heyət olsun. İki eyni səviyyədə heyəti saxlamaq heç də asan deyil. Hamı oynamaq istəyir. Amma eyni səviyyədə olan 14-15 futbolçu istənilən komandada olur. Bu, Avropada bəs edir. Amma bizə ola bilər ki, Avropa səviyyəsində bəs eləmir. Əlimizdə olan imkanlardan maksimum istifadə çalışırıq. Tək "Qarabağ" üçün yox, futbolumuz üçün görüləcək işlər çoxdu.

- Bu oyundan sonra hansı hissləri keçirirsiniz?

- Özümə görə təəssüflənmirəm, futbolçularıma, azarkeşlərimizə görə üzülürəm. Həqiqətən çox inamlı idilər. Deyirdilər ki, məğlub olsaz belə, yanınızdayıq. Bundan böyük dəstək ola bilməz. Azərbaycanda futbolu sevirlər. Onları qaçırmaq lazım deyil. Əksinə, onları stadionlara cəlb etmək lazımdı. Bu gün məğlub olsaq da, onları güvən verə bilmişik. Bundan əl çəkməli deyilik. Hamımız istəyərdik ki, fərqli olsun. Amma bunlar hamısı futbolun qaçılmaz epizodlarıdır. İnanıram ki, bu cür səhvlər bizi daha da böyüdəcək. Bu gün klub olaraq büdcədə, texniki heyətdə zəif ola bilərik. Amma birliyimiz, inamımız varsa, belə böyük komandalara qarşı mübarizə apara biləcəyik, aparacağıq da...