AFFA gənc hakimlər üçün akademiya açacaq: "Prezidentliyə namizədliklə bağlı rəsmi qaydada müraciət edən yoxdu"

AFFA-nın baş katibi Sərxan Hacıyev Gəncədə “Kəpəz”in yeni istifadəyə verilən futbol akademiyasına media turdan sonra brifinq keçirib.

Qurum rəsmisi Presssport.az-ın Gəncəyə ezam olunmuş əməkdaşının da suallarını cavablandırıb.

- Səfərin məqsədi "Kəpəz" Futbol Klubunun ərazisində yerləşən baza ilə tanış olmaqdır. Bu baza AFFA, FIFA və UEFA-nın dəstəyi ilə tikilib. Bura Azərbaycanda ən böyük futbol bazasıdır. Tam olaraq fəaliyyətə başlayandan sonra bura Azərbaycan futboluna öz müsbət töhfəsini verəcək. Ərazidə bazadan əlavə iki təbii, bir süni örtüklü məşq meydançası inşa olunub. Bunlardan əlavə son illərdə Gəncə şəhərində iki 42x22 ölçülü minifutbol meydançası salınıb. AFFA hər zaman çalışır ki, Azərbaycanın müxtəlif bölgələrində infrastruktur layihələri keçirsin və hər regiona bərabər şəkildə yanaşma olsun.

• Artıq qərb bölgəsində iki akademiya fəaliyyət göstərir. Biri Tovuzda, digəri isə Gəncədə. Növbəti dayanacaq hansı regionda olacaq?
• Hazırda konkret dayanacağı deyə bilmirik. Lakin əminliklə deyə bilərəm ki, layihə növbəti illərdə digər bölgələri də əhatə edəcək.
• Bir neçə dəfə çıxışlarınızda oyun alqı-satqısı ilə bağlı fikirlər səsləndirmisiz. Həmin şəxslər nə vaxt layiqli cəzalarını alacaq?
• Bəli, bu məsələ bir neçə dəfə mənim tərəfimdən qeyd olunub. Bir daha bunu təsdiq edirəm. Təəssüflər olsun ki, bu məsələ var. Hazırda tamamlama işləri gedir. Yaxın günlərdə AFFA-nın aidiyyəti komitəsi tərəfindən müəyyən qərarlar veriləcək. Əlbəttə ki, ictimaiyyətə açıqlanacaq.
• Bu siyahıda Premyer Liqa klubları da var?
• Xeyr. Yalnız I və II Liqada müəyyən xoşagəlməz hallar var.
• Aprelin 2-si AFFA-da prezident seçkiləri keçiriləcək. Yeni komandada təmsil olunacaqsız?
• Baş katibin təyinatı prezidentin tövsiyyəsi və İcraiyyə Komitəsinin qərarından asılıdır. Hazırda bununla bağlı bir söz demək çətindir.
• "Qarabağ"ın "Bayer"lə oyunundan sonra hansı hissləri keçirdiniz?
• Əminəm ki, hər bir Azərbaycan vətəndaşı bu hissləri keçirdi. Dünən yaşadıqlarımızı sözlə ifadə etmək mümkün deyil. "Qarabağ" bir mövsüm ərzində Avropada iki böyük tarix yazdı. Fürsətdən istifadə edərək "Qarabağ" kubunu bizə yaşatdığı xoş hisslərə görə təbrik edirəm. Dünənki matç rəqibi də nəzərə alaraq qalibiyyətə bərabər oyun idi. Düşünürəm ki, "Qarabağ" hər birimiz üçün qalibdir.
• Elxan Məmmədov AFFA-nın baş katibi olan dönəmdə İsmayıllı rayonunda iki minifutbol meydançası inşa olunmalı idi. Bunlardan biri tikildi, digərindən isə xəbər yoxdur. Həmin meydanda yaxın müddətdə salınacaq?
• Bəli. Həmin müddətdə AFFA-nın belə bir layihə var idi. Meydançanın salınması planda nəzərdə tutulmuşdu. AFFA həm Bakıda, həm regionlarda 42x22 ölçülü meydançalar salırdı. Sonradan müəyyən daxili məsələləri nəzərə alaraq həmin layihə müvəqqəti olaraq dayandırıldı. Hazırda nə vaxt olacağını demək çətindir. Əlbəttə ki, ümid var. Çünki, bu layihənin müsbət tərəfləri az deyil. Layihəni yenidən bərpa etmək üçün ümidlər var. Sadəcə bir az zaman lazımdır.
• Premyer Liqada komanda sayının artırılması gündəmdə var? Bu mövsüm sonuncu yeri tutan komanda aşağı liqaya düşəcək?
• Bəli. Sonuncu yeri tutan komanda Premyer Liqanı tərk edəcək. İdman prinsipləri mütləq şəkildə qorunacaq. I Liqada qalib olan komanda da Premyer Liqaya vəsiqə qazanacaq. Lakin növbəti mövsüm üçün komanda sayının artırılması bu gün üçün müzakirə mövzusu deyil.
• Millinin baş məşqçisi postuna yerli, yoxsa əcnəbi mütəxəssis axtarılır?
• Bu sualı cavablandırmaq üçün bir az zamana ehtiyac yox. Baş məşqçi seçimi ilə bağlı İşçi Qrupu yaradılmışdı. Orada müəyyən fikir mübadilələri aparılırdı. İşçi Qrupunda konkret olaraq yerli və ya əcnəbi məşqçi olsun fikirləri səsləndirilməmişdi. Ümumi olaraq baş məşqçinin hansı kriteriyalara cavab verməsi yönündə müzakirələr gedir.
• Mətbuatda belə fikirlər var ki, AFFA-nın yeni prezidenti "Neftçi"nin Müşahidə Şurasının rəhbəri Rövşən Nəcəf olacaq. Bu barədə ictimaiyyətə nə deyə bilərsiniz?
• Hazırda bununla bağlı rəsmi məlumat yoxdur. AFFA-nın nizamnaməsinə uyğun olaraq müəyyən prosedurlar aparılır. Bu prosedurların məxfiliyini qorumalıyıq.
• Namizədlər var?

Rəsmi qaydada AFFA-ya müraciət edən yoxdur. Nizamnaməyə görə konfransa 10 gün qalmışa kimi müraciətlər AFFA-nın katibliyinə daxil olmalıdır. Hələ ki, vaxt var.

• İndiki reallığa əsasən Premyer Liqanı tərk etməyə ən real namizəd "Qəbələ"dir. Ən böyük infrastruktura malik olan klubun aşağı liqaya düşməsi ölkə futboluna necə təsir edəcək?
• Komanda I Liqaya düşsə, dövlət tərəfindən ayrılan vəsaitin həcmi azalacaq. Lakin hazırda konkret olaraq bu barədə söz demək çətindir. Yalnız zamanla bu məsələyə aydınlıq gələ bilər.
• Yeni qanunla vergilərin 20 faiz qalxması klublara mənfi təsir edir. Növbəti mövsümdə klublara dövlət tərəfindən ayrılan vəsaitin həcmi artırıla bilər?
• Bu da klubların sayının artırılması kimi bir məsələdir. Hazırda gündəmdə deyil.
• Futbol sahəsində vergi güzəştlərinin edilməsi təklifi oluna bilər?
• Hazırda müzakirə olunmur.
• Bir müddət əvvəl "Rabitəbank"la AFFA arasında əməkdaşlıq müqaviləsi imzalandı. Buna əsasən hakimlərin formasının üzərində bankın adı yazılmalı idi. Bu, nə vaxt olacaq?
• Ən yaxın həftələrdən başlamalıdır.
• Müqavilənin müddəti nə qədərdir?
• Müqavilənin şərtlərini indi açıqlaya bilmərik. Müddəti 2025/2026 mövsümünün sonuna qədərdir.
• Klublar hakimliklə bağlı məsələləri tez-tez gündəmə gətirir. Baş katib olaraq sizin hakimliyə münasibətiniz necədir?
• Müəyyən müsbət məqamlar var. Bir çox oyunlarda görürük ki, VAR-ın müdaxiləsindən sonra düzgün qərarlar verilir. Hərdən səhv qərarlar da olur. Hakimlər Komitəsi ilə birlikdə çalışırıq ki, hər səhvin üzərində iş aparılsın. Ümumiyyətlə istəyirik ki, daha böyük fikir gənc hakimlərə yönəlsin. Yaxın gələcəkdə hakimlər üçün yeni akademiyanın açılmasına çalışırıq. Belə bir plan var.
• Hakimlər Komitəsinin sədri Barış Şimşəkin müqaviləsi yayda bitir. Onun sözləşməsini uzatmaq fikriniz var?

- Hazırda bu məsələ gündəmdə deyil.