"Futbolçularımın göstərdiyi performans alqışalayiqdi" - Ayxan Abbasov

"Bu gün stadionda möhtəşəm atmosfer var idi. "Qarabağ"ın Tovuza gəlişini hiss etdik. Çoxdandır evdə uduzmurduq. Bu seriyanı davam etdirmək istəyirdik. Amma güclü komandaya qarşı oynayırdıq. Otto Con ikinci qolu vursaydı, oyunun axarı başqa cür ola bilərdi. Futbolçularımın göstərdiyi performans alqışalayiqdi. Bu tempi saxlamalıyıq. Ümid edirəm ki, fasilədə zədəli oyunçularımız qayıdacaq".

Presssport.az verir ki, bu sözləri "Turan Tovuz"un baş məşqçisi Ayxan Abbasov Premyer Liqanın 27-ci turunda "Qarabağ"la matçdan sonra keçirdiyi mətbuat konfransında deyib.

O, ardından jurnalistlərin suallarını cavablandırıb:

- Cəzalı Bruno Qonçalveşin yoxluğu hiss olunurdu?

- Bütün futbolçuların yeri görünürdü. Amma onların yerində oynayanlar çalışdılar. Paçunun yoxluğu neçə oyundur bizə təsir edir. Bütün futbolçular bizim üçün dəyərlidi. Hamı sağlam olanda bizim üçün daha rahat olur. 

- Eyni mövqedə oynayan bir neçə futbolçu var. Bu, heyəti qurarkən sizə mane olmur?

- Yox. Oyun olub ki, Ayxan Quseynovla Fərid Nəbiyev eyni anda meydana çıxıblar. Rəqibə görə heyət qururuq. Heyət geniş olmalıdır. Xəyal Nəcəfovu qışdan sonra hər dəfə əsas heyətdə oynatmaq istəyəndə zədələnir. Bu gün pis təsir bağışlamadı.

- Veysəl Rzayevin oynamamasının səbəbi nə idi?

- Qolu sınıb. Yəqin ki, çempionat onun üçün başa çatıb.

-  Geridə qalan III dövrəni necə dəyərləndirirsiniz?

- Üçüncü dövrəni yaxşı keçirdik. Məğlubiyyətlə başlasaq da, sonra vacib qələbələr qazandıq. Dördüncü dövrə hər kəs üçün çətin olacaq. Buna hazırlaşacağıq.

- Bu gün sanki "Bayer" - "Qarabağ" matçının təkrarı idi. Rəqib dəyişikliklər etdikdən sonra oyunu dəyişə bildi. Siz necə düşünürsünüz?

- Buna hazır idik. Bu heyəti gözləyirdik. Dəyişikliklərin də olacağını bilirdik. Bu gün ustalıq öz sözünü dedi. Bizim üçün də belə oyunlar lazımdır. İlk hissədə demək olar ki, "Qarabağ"a epizod vermədik. İkinci yarıda isə çətinlik çəkdik.