Bəhlul Mustafazadə: "Belə oyunlar komandaya əlavə güc verir”

“Çox qol şansımız oldu. Düşünürəm ki, yaxaladığımız epizodları daha tez qola çevirməli diik Lakin yalnız sonda fərqlənə bildik. İstənilən halda, qələbə qazanmaq xoşdu. Bizim üçün yaxşı sınaq oldu. Bəzən belə oyunlar komandaya əlavə güc verir”.

Presssport.az xəbər verir ki, bu sözləri milli komandamızın futbolçusu Bəhlul Mustafazadə “FIFA series - Edition 2024” layihəsi çərçivəsində Monqolustan üzərində qazanılan 1:0 hesablı qələbəni şərh edərkən deyib. 

Onun fikrincə, qalibiyyətin çətinliklə əldə olunmasının səbəbi yaxaladıqları epizodları daha yaxşı dəyərləndirməmələri idi: "Bu halda daha çox qol vura bilərdik. Lakin bəzən alınır, bəzən isə yox. Bu gün də rəqib müdafiəsini çox gec yara bildik”.  

Millinin qələbə qolunun müəllifi olan Bəhlul məşqlərdə standart vəziyyətlər üzərində çalışdığını vurğulayıb: “Çalışıram ki, daha çox qol vurum, komandama tək müdafiədə deyil, standart vəziyyətlər zamanı irəlidə də kömək edim. Məşqlərdə bunun üzərində işləyirəm. Bəzən mən, bəzən başqası qol vurur. Bu, futboldu. Kimin fərqlənməsi elə də vacib deyil. Əsas odur ki, qələbə qazandıq”. 

27 yaşlı mərkəz müdafiəçisi növbəti matçda da qalib gəlməyə çalışacaqlarını vurğulayıb: “Bolqarıstanla görüşdə də meydana yalnız qələbə üçün çıxacağıq. Həm də çalışacağıq ki, yaxşı oyun göstərək. Bugünkü qələbənin ardını gətirmək istəyirik”. 

Mustafazadə hazırda milliyə rəhbərlik edən Arif Əsədovdan da söz açıb: “Arif müəllim tanıdığımız, daha əvvəl birgə işlədiyimiz məşqçidi. Biz onun, o da bizim iş prinsipimizə bələddi”. 

“Sizcə, millinin yeni baş məşqçisi yerli, yoxsa əcnəbi olmalıdır?” sualını Mustafazadə belə cavablandırıb: “Bu, səlahiyyətimdə olan məsələ deyil. Baş məşqçi kim olsa, biz futbolçular eyni qaydada çalışmağa davam edəcəyik”.