"Sabah" üzüldü, "Sərhədçi" sevindi

"Sərhədçi” İdman Mərkəzində basketbol üzrə Azərbaycan Kubokunun B qrupunda son iki oyun keçirilib.

Presssport.az xəbər verir ki, günün ilk oyunu "Gəncə" və “Şəki” arasında baş tutub.

Bu oyun gəncəlilərin 85:78 hesablı qələbəsi ilə yekunlaşıb. Ən məhsuldar basketbolçular "Gəncə"də Donovan Filds (20 xal, 7 asist), "Şəki"də Simeus Vebster (22 xal, 14 ribaund) olub.

Günün ikinci oyununda qrupdan çıxmaq uğrunda mübarizə aparan "Sabah"la "NTD-İndiqo” üz-üzə gəlib. Bu görüşdə "NTD-İndiqo" 89:85 hesablı qələbə qazanaraq, B qrupunu lider tamamlayıb. "Sabah"ın məğlubiyyəti nəticəsində "Sərhədçi" yarımfinala vəsiqə qazanıb. Ən məhsuldar basketbolçular "Sabah"da Endər Poladxanlı (21 xal, 10 ribaund), "NTD-İndiqo"da Qriffin Remmi (21 xal, 11 asist) olub.

Kubokun yarımfinal oyunları ("NTD-İndiqo" - "Xəzri", "Neftçi" - "Sərhədçi") 17 apreldə keçiriləcək.