Diniyev sevindi, Şeydayev məyus oldu

Türkiyə I Liqasında XXXI tura yekun vurulub.

Presssport.az xəbər verir ki, millimizin futbolçularının forma geyindiyi komandalar üz-üzə gəlib.

Belə ki, Coşqun Diniyevin çıxış etdiyi “Ümraniyespor” Ramil Şeydayevin şərəfini qoruduğu "Kocaelispor"u qəbul edib. 

Qarşılaşma meydan sahiblərinin 1:0 hesablı qələbəsi ilə başa çatıb.

Azərbaycanlı futbolçular da bu görüşün iştirakçısı olub. Onların hər ikisi matça start heyətdə meydana çıxıb. Coşqun 79-cu dəqiqədə əvəzlənibsə, Ramil 90 dəqiqə meydanda olub.

31 turdan sonra 52 xal toplayan "Kocaelispor" turnir cədvəlinin 6-cı pilləsində qərarlaşıb. Xallarını 37-yə yüksəldən "Ümraniyespor" isə 11 yerdədi.